WASHINGTON, 19 d'Agostu (EUROPA PRESS)
La Policía que respondió a les protestes na población de Ferguson, nel estáu norteamericanu de Missouri foi víctima esti llunes de nueche d'un "intensu tirotéu", según un voceru, Ron Johnson, que fizo balance d'una nueva xornada de disturbios pola muerte del mozu negru Michael Brown a manes d'un axente.
Les protestes celebráronse nun ambiente tirante pero pacífico mientres tola tarde, anque a última hora dellos participantes llanzaron botelles y piedres a los axentes, asina como dellos cócteles molotov, ante lo que los axentes recurrieron a granaes alloriantes y gases llarimosos.
Johnson acusó a una "pequeña minoría d'alborotadores" de cometer "actos criminales" y denunció un "intensu tirotéu" contra les fuerces de seguridá. "Nun son actos de manifestación sinón de violencia", añadió, nuna rueda prensa na qu'alvirtió e qu'esti tipu de protestes "ponen en riesgo vides", según NBC News.
La xornada del llunes acabó con polo menos 31 persones deteníes, ente elles delles procedentes de Nueva York y California. El voceru de la Policía pidió a los manifestantes pacíficos que se concentren namás mientres el día pa torgar que los violentos s'aprovechen d'estes protestes.
Esti mesmu llunes, el gobernador de Misuri, Jay Nixon, llevantó'l toque de queda impuestu nel suburbiu de Saint Louis por mor de les protestes surdíes tres la muerte de Michael Brown, argumentando que cola llegada de la Guardia Nacional nun va ser necesario.
