EL CAIRU, 26 de Mayu (Reuters/EP)
Polo menos 26 persones morrieron y otres tantes resultaron firíes esti vienres de resultes d'un ataque d'homes armaos contra un autobús que treslladaba a cristianos coptos pela provincia de Menia, nel centru del país, según informaron fontes médiques y testigos de los fechos.
El grupu de cristianos coptos viaxaba a bordu de dos autobuses y un pequenu camión pela provincia de Menia, qu'acueye una notable comunidá cristiana. Essam al Bedaiwy, gobernador de la rexón de Menia, informó nun primer momentu de que l'ataque dexó polo menos 23 muertos y 25 firíos.
Dellos testigos dixeron que los coptos sufrieron l'ataque cuando se dirixíen a rezar al monesteriu de San Samuel el Confesor, asitiáu nel oeste de la provincia. Los testigos señalaron qu'homes amazcaraos dieron l'altu a los autobuses na carretera que lleva al monesteriu y abrieron fueu.
Los cristianos coptos, que representen el 10 por cientu de la población d'Exiptu, un país con 92 millones de persones, sufrieron dellos atentaos con víctimes nos últimos meses. Dende avientu, unes 70 persones morrieron n'atentaos con bombes cometíos contra ilesies nes poblaciones d'El Cairu, Alexandría y Tanta. Los anteriores atentaos reivindicólos el grupu terrorista Estáu Islámicu. De momentu, nengún grupu atribuyóse l'autoría del ataque d'esti vienres.
