MADRID, 25 de Mayu (EUROPA PRESS)
El PP perdió la mayoría del poder autonómicu que tenía dende'l 2011, puesto que nun llogró revalidar nenguna de les sos mayoríes absolutes, y namás va poder siguir gobernando en Castiella y Lleón, Murcia y La Rioja, onde raspió la llamada cifra de la metá más unu de los diputaos, si pacta con Ciudadanos. La formación que lidera Albert Rivera tamién va ser clave na Comunidá de Madrid, dao que'l PP precisarálos pa siguir nel Gobiernu.
Pela so parte, el PSOE llogró repitir como fuerza más votada n'Asturies y Javier Fernández tendría na so mano retener el gobiernu si llega a un acuerdu con Podemos. Los socialistes tamién recuperaríen Extremadura, onde Guillermo Fernández Vara podría volver gobernar tres la llexislatura que lideró'l 'popular' José Antonio Monago, si pacta col partíu de Pablo Iglesias.
En total, el PP ganó en nueve de les 13 comunidaes que güei celebraron elecciones autonómiques, pero namás tien facilidaes de renovar gobiernos en La Rioja, Murcia, Castiella y León y Madrid, si atrái a Ciudadanos.
FABRA, COSPEDAL Y RUDI PUEN ACABAR DESAGOSPIAOS
Na Comunidá Valenciana, onde'l PSOE foi'l segundu más votáu, un acuerdu de los partíos d'izquierdes (PSOE-Compromís-Podemos) podría arrampuñar el gobiernu a Alberto Fabra. Y otru tantu podría pasar en Castiella-La Mancha, onde los d'Emiliano García-Page y Podemos sumen la mayoría absoluta qu'hasta agora tenía la secretaria xeneral del PP, María Dolores de Cospedal.
N'Aragón la fuerza más votada foi'l PP de Luisa Fernanda Rudi, pero podría haber un gobiernu d'izquierdes si s'unen PSOE, Podemos, la Chunta Aragonesista ya IU. El Gobiernu de Cantabria vuelve tar por cuenta de lo que decida'l PRC de Miguel Ángel Revilla que sacó 12 diputaos, unu más que'l PP.
Y en Baleares el PP tamién ganó pero podría crease un hipotéticu gobiernu d'izquierdes, col PSOE y Podemos, que sumen 23 diputaos, pero tendríen que facese col apoyu d'otros partíos p'axuntar los 7 que-yos faltaríen pa la mayoría absoluta. Asina podríen 'xugar' con MES (6), la PI (4), MPM (3) y GxF+PSIB, que saca unu.
EL GOBIERNU DE UPN, NEL AIRE
Pela so parte, UPN ganó les elecciones forales en Navarra con 15 escaños, lo que supón cuatro menos que los que llogró nel 2011, y la so continuidá nel Gobiernu foral queda nel aire, puesto qu'un acuerdu ente polo menos cuatro partíos dexaríalu fuera del Palaciu de Navarra.
En concreto, la suma de Geroa Bai (9), EH Bildu (8), Podemos (7) y Izquierda-Ezkerra (2) torna en 26 escaños, la cifra que da mayoría absoluta y que podría suponer un cambiu de Gobiernu en Navarra.
En Canaries, anque'l partíu más votáu foi'l PSOE cola candidatura de Patricia Hernández, n'escaños ganó Coalición Canaria con 18, que podría pactar colos socialistes que caltuvieron los 15 que teníen, pa siguir nel gobiernu. El PP quedó con 12 representantes de los 21 que tenía, Podemos sumó 7 y Nueva Canarias cinco.
Podemos llogró entrar nos trece parlamentos autonómicos que taben en xuegu nestes elecciones autonómiques, anque nun llogró pasar del tercer puestu en nenguna de les rexones. Sicasí, va ser decisivu na formación de Gobiernos en munches de les Comunidaes como Extremadura, Asturies, Aragón o Castiella-La Mancha.
Pela so parte, nel so estrenu nunes autonómiques fuera de Cataluña, Ciudadanos llogró representación en toles comunidaes disputaes, menos en Castiella-La Mancha, Navarra y Canaries y va ser decisivu na Comunidá de Madrid y, en menor midida en La Rioxa, Murcia y Castiella y Lleón.
IU NAMÁS TA PRESENTE N'ASTURIES, ARAGÓN, NAVARRA Y CyL
Izquierda Unida esbarrumbóse nos parlamentos autonómicos, nos que pasó de tener 35 representantes a ocupar tan solo 9 escaños. La cayida más dramática foi la de l'Asamblea de Madrid, onde tenía 13 y yá nun-y queda nengún. Tamién quedó ensin diputaos na Comunidá Valenciana, onde tenía cinco representantes, n'Estremadura (llogró 3 nel 2011), y perdió'l so escañu en Murcia.
Amás, pasó de cuatro diputaos a unu n'Aragón, de trés representantes a dos en Navarra y caltuvo un escañu en Castiella y León. El meyor resultáu foi'l llográu n'Asturies, onde llogró caltener cinco diputaos col soa antiguu coordinador federal y diputáu, Gaspar Llamazares, como candidatu.
Del so llau, Unión, Progreso y Democracia (UPyD), que nel 2011 llogró tener representación na Asamblea de Madrid (8 escaños) quedó sin nengún diputáu autonómicu nes 13 comunidaes nes qu'hubo comicios.
