UVIÉU, 7 d'Ochobre (EUROPA PRESS)
La Presidencia d'Izquierda Unida d'Asturies propunxo al coordinador xeneral de la coalición a nivel autonómicu, Manuel González Orviz, como candidatu pa les primaries de la plataforma Ahora en Común pa escoyer al cabeza de llista por Asturies a les elecciones xenerales.
El Conseyu Políticu d'IU Asturies alderica nestos momentos la propuesta de la Presidencia. El diputáu d'IU na Xunta Xeneral, Ovidio Zapico, yá confirmó esti fin de selmana que la coalición tomaría parte nel procesu de primaries.
El mesmu Orviz esti martes indicó qu'IU participaría nes Primaries d'Ahora en Común, lo mesmo nel ámbitu estatal como d'Asturies, porque asina s'acordó nel Conseyu Políticu. Ello ye qu'apuntó que nesti día entamarán contactos a nivel federal de cara a dir fixando posiciones.
Too ello al marxe de noticies que, según él, son "poco ciertes", como ye la invitación personal de Podemos a dalgún de los dirixentes d'IU. Orviz caltuvo que la respuesta de los dirixentes de la coalición ye "clara", nel sen de que toos ellos van participar nes primaries d'Ahora en Común.
