ERBIL (IRAK), 22 d'Ochobre (Reuters/EP)
El Parlamentu del Kurdistán iraquín dio'l preste esti miércoles al envíu de combatientes peshmerga a l'arrodiada ciudá curda de Kobani, nel norte de Siria, vía Turquía.
El presidente del Kurdistán iraquín, Masud Barzani, envió una carta al Parlamentu a última hora del martes solicitando l'aprobación del esplegue de los peshmergues pa que puean lluchar xunto a los combatientes curdos sirios na defensa de Kobani.
La población, ubicada xunto cola frontera con Turquía, foi oxetu del asediu per parte d'Estáu Islámicu dende va selmanes. Los sos milicianos, meyor armaos que los combatientes curdos, llograron facese col control de delles zones.
"Güei nel Parlamentu acordamos enviar a les fuerces peshmerga a Kobani lo antes posible", indicó'l diputáu Mahmud Haji Omer.
Pela so parte, el ministru pa los Peshmerga, Mustafa Saed Qadir, dixo que tovía nun se fixó'l númberu d'efectivos que va enviase. "Les fuerces peshmerga van tar en Kobani'l tiempu que creeamos que ye necesario", señaló, citáu pola axencia llocal BasNews.
Dos responsables curdos dixeron el martes que los preparativos taben en cursu pal envíu d'un pequeñu númberu de peshmerga a Kobani, pero esclararon que llevaría dellos díes hasta que se ficieren tolos preparativos.
Hemin Hawrami, un responsable curdu, dixo en Twitter que los peshmerga van dir provistos con armamentu pesao.
