MADRID, 11 de Febreru (EUROPA PRESS)
Un equipu internacional de científicos llogró observar la primera vez les ondes gravitacionales, un fenómenu que predixo Albert Eintein va 100 años.
"Detectamos ondes gravitacionales. Ficímoslo". Asina lo anunció'l director executivu del Observatoriu d'Ondes Gravitacionales con Interferómetru (LIGO), David Reitze, investigador del Institutu Tecnolóxicu de California (Caltech), nuna rueda de prensa convocada nel National Science Foundation en Whashington DC. Amás, precisó que les ondes vistes créense pola fusión de dos furacos negros.
Los científicos pudieron observar y confirmar de manera tanxible la Teoría de la Relatividá d'Einstein, que dicía qu'oxetos aceleraos producen distorsiones del espaciu-tiempu que se propaguen per tol Universu. Estes distorsiones son les ondes gravitacionales, según l'estudiu, publicáu en Physical Review Letters.
Según apunta'l Grupu de Relatividá y Gravitación de la Universitat de Les Illes Balears, l'únicu equipu español participante nel proyectu LIGO, la distorsión produzse porque les ondes enanchen l'oxetu nuna dirección y allárguenlu n'otra. Ésta ye la manera en que les ondes van propagase, viaxando per tol espaciu a la velocidá de la lluz.
Como exemplu, los espertos planteguen l'escenariu nel qu'un oxetu alcuéntrense xunto con dos furacos negros nun choque, a una distancia de millones de kilómetros o menos. Nesta situación, l'oxetu espurriríase tanto que quedaría estrozáu. Sicasí, esto namás pasa en distancies cortes. Cuando les ondes lleguen a la Tierra producen cambios bien pequeños nes distancies, diferencies inclusive menores que'l tamañu d'un protón.
Por ello, l'observatoriu d'ondes gravitacionales, conocíu como LIGO, nun ye como los avezaos. Nun ye un telescopiu al usu, sinón que ta formáu por dos tubos de vacíu que s'asitien orientaos a distintes direcciones (norte-sur, esti oeste) y nel so interior cuenta con un láser que mide en tou momentu'l so estáu. Asina, cuando una onda gravitacional pasa pela Tierra, el láser detecta qu'unu de los tubos encueye, mientres que l'otru faise más llargu: l'efectu d'esti fenómenu.
En relación al orixe de les ondes, los investigadores indicaron que se formen en dalgunos de los socesos más violentos qu'asoceden nel Universu, como choques de furacos negros, esplosiones d'estrelles supernova o españíos de rayos gamma.
INFORMACIÓN NUEVA SOBRE L'UNIVERSU
Por eso, al traviés del descubrimientu de les ondes podrá entendese muncho meyor los mecanismos polos qu'asoceden estos socesos. De la mesma, los espertos señalaron que les ondes ofrecen una información bien distinta a la llograda pola radiación electromagnética (lluz), que ye lo que s'usa davezu pa observar el cosmos, les ondes ofrecen nueva.
Concretamente, apunten que los mecanismos que les producen son distintos. Por exemplu, un furacu negru nun emite nengún tipu de lluz, pero dalgunos sí qu'emiten ondes gravitacionales. Eso torna nuna "ferramienta única" pa esplorar dalgunos de los oxetos más enigmáticos del Universu.
El Grupu de Relatividá y Gravitación indica tamién que podrá observase hasta lo que pasó dempués del Big Bang, cuando'l cosmos nun tenía nin un segundu d'edá. Esta información non podría conocese d'otra forma, porque l'Universu nun foi tresparente a la lluz hasta tiempu dempués.
