UVIÉU, 1 Oct. (EUROPA PRESS) -
El Gobiernu del Principáu d'Asturies atropó de xineru a xunetu un déficit de 61 millones d'euros, lo que supón un 0,27% del productu interior brutu (PIB) rexonal, según datos publicaos pol Ministeriu de Facienda y Alministraciones Públiques y recoyíos per Europa Press.
Nel mesmu periodu del añu anterior, Asturies tuviera superávit, concretamente del 0,24 por cientu, lo que supunxo 24 millones d'euros.
Polo que se refier al déficit acumuláu de toles comunidaes autónomes hasta xunetu d'esti añu, supón 10.658 millones d'euros, un 1% del PIB.
Navarra, con un 2,59%, Extremadura (1,23%) y Murcia (1,42%) fueron les comunidaes autónomes qu'algamaron mayor déficit de xineru a xunetu d'esti añu. Per otra parte, Baleares foi la que menos tuvo, namái un 0,01 por cientu. Asturies (0,27%) y Canaries (0,30%) completen la llista de les comunidaes qu'atroparon menos déficit. Nenguna rexón tuvo anguaño superávit.
Nel conxuntu d'España, el déficit públicu del conxuntu de les alministraciones xubió a 36.472 millones d'euros hasta finales del segundu semestre de 2014, asitiándose nel 3,43% del PIB.
Nel mesmu periodu del añu anterior esti datu foi del 3,68%. El Ministeriu de Facienda y Alministraciones Públiques informó de que, hasta xunetu, el déficit consolidáu de l'Alministración Central, Seguridá Social y Comunidaes Autónomes foi del 3,87% del PIB.
Escluyendo'l gastu por intereses, el déficit primariu del conxuntu de les Alministraciones Públiques amenórgase un 22%, asitiándose nel 1,80% del PIB frente al 2,34% del exerciciu anterior.
Según Facienda, l'Alministración Local volvió a rexistrar un superávit hasta xunu de 1.048 millones, lo qu'equival al 0,10% del PIB.
Amás, el Departamentu que dirixe Cristóbal Montoro informó que, en cumplimientu de la normativa comuñal, el Gobiernu corrixó'l datu de déficit de les Alministraciones Públiques al zarru de 2013. En concreto, el datu comunicáu a les autoridaes europees meyora pasando d'un 6,62% a un 6,33%.
Los datos provisionales de 2013 nun inclúin les ayudes al sector financieru y refundien una cifra de 66.394 millones d'euros de déficit. D'esta forma, España cumpliría coles mires d'amenorgamientu del déficit fixáu nel 6,5% del PIB pa 2013 aprobáu pol Conseyu d'Estáu.
