UVIÉU, 1 Oct. (EUROPA PRESS) -
El Conseyu de Gobiernu decidió presentar un recursu énte'l Tribunal Constitucional pa evitar que l'Executivu central imponga, por mediu d'un real decretu-llei, la llibertá d'horarios comerciales nos conceyos d'Uviéu y Xixón. El Principáu tomó esta decisión dempués de conocer el criteriu favorable del Conseyu Consultivu.
El Gobiernu de Mariano Rajoy aprobó en xunetu'l Real Decretu-llei d'Aprobación de Midíes Urxentes pa la Medría, la Competitividá y la Eficiencia. Conforme a esa norma, diez municipios españoles -ente ellos, los dos ciudaes más poblaes d'Asturies, Uviéu y Xixón- tán obligaos a declarar parte del so territoriu zones de gran afluencia turística, nes que va haber llibertá d'horarios comerciales. Los conceyos disponen de seis meses pa cumplir con esta esixencia; de lo contrario, la llibertá d'horarios va imponese non en parte, sinón en tola estensión del conceyu.
El Gobiernu d'Asturies entiende que'l decretu-llei invade les sos competencies y choca cola política desenvuelta pola Conseyería d'Economía y Empléu pa protexer a los pequeños y medianos establecimientos comerciales. Por ello, plantegóse la posibilidá de dir al Constitucional. Una vegada que los servicios xurídicos del Principáu informaron favorablemente, el Conseyu de Gobiernu solicitó'l dictame correspondiente al Conseyu Consultivu.
Nel so informe, el Consultivu conclúi que'l real decretu-llei invade competencies propies de la comunidá autónoma. Con esta norma, el Gobiernu central escosa la capacidá regulatoria del Principáu nos dos conceyos con más habitantes de la comunidá, cola relevancia qu'ello supón.
Pal Consultivu tampoco ta xustificada l'usu d'un real decretu-llei, acutáu pola Constitución (artículu 86) pa casos d'estraordinaria y urxente necesidá, circunstancies que nun se dan nesti casu. El dictame nun aprecia conexón ente la situación d'urxencia qu'invoca'l Gobiernu central y la norma adoptada.
Enantes d'aprobar la interposición del recursu, el Gobiernu asturianu -en concreto, la conseyería d'Economía- caltuvo alcuentros coles partes implicaes: con asociaciones de comerciantes y con representantes municipales d'Uviéu y Xixón. Toos coinciden en que l'aplicación del real decretu nun ta xustificada y puede resultar lesiva pal desenvolvimientu de l'actividá comercial; en particular, pa los pequeños y medianos establecimientos.
