UVIÉU, 23 Abr. (EUROPA PRESS) -
El Gobiernu del Principáu d'Asturies ultima la so propuesta de la Llei de Biblioteques, que va tener como exes fomentar la llectura y definir el sistema bibliotecariu de la comunidá autónoma, según anunció esti miércoles la conseyera d'Educación, Cultura y Deporte, Ana González.
En rueda de prensa por cuenta de la celebración del Día del Llibru, la titular de Cultura resaltó la importancia d'esta norma yá que la rede pública de biblioteques supón "el primer equipamientu cultural d'Asturies", tanto pola so tradición como pol númberu d'usuarios, qu'en 2013 foron más de tres millones.
D'esta manera, la conseyera espera qu'en mayu se pueda constituyir la Comisión Asesora que revise la propuesta del Executivu y ellabore l'anteproyectu de llei pa la so tramitación na Xunta Xeneral. "La rede de biblioteques ye bien madura y ye necesario protexela", afirmó.
Coles mesmes, punxo en valor "l'esfuerzu titánicu" de l'alministración autonómica por caltener anguaño la inversión de 250.000 euros pa l'alquisición de fondos.
Al respeutu, el viceconseyeru de Cultura y Deporte, Alejandro Calvo, incidió nel compromisu del Principáu cola compra de llibros pa fondos de la rede de biblioteques mentes que, apunta, el Gobiernu central esanició la inversión pa fondos físicos en favor del llibru electrónicu.
"GÜEI DEBERÍAMOS TOOS LLEER"
Ana González fixo un llamamientu a la llectura pa esti Día del Llibru. "Güei deberíamos toos lleer", animó, señalando que tan bono sería averase a los clásicos como a les novedaes lliteraries nuna comunidá que destaca pola "bona salú" de les sos biblioteques.
Nesti sentíu, destacó que la rede asturiana algamó los 1.503.000 emprestamos en 2013, de los que 1,4 millones correspuenden a llibros y el restu a otros soportes, como sonoru o audiovisual.
Igualmente, resaltó que les actividaes de conmemoración del Día del Llibru nun namás se desenvuelven nes biblioteques públiques, sinón que tamién se sumaron otros equipamientos culturales como'l Muséu de Belles Artes, l'Arqueolóxicu y el Centru Niemeyer, qu'amás de participar nun 'bookcrossing' ufierten teatru o sesiones de cuentacuentos.
Igualmente, esti xueves 24 d'abril ta prevista la participación de la escritora estadounidense Donna Leon nel 'Ciclu de la Palabra' del Centru Niemeyer xunto a Alejandro Gallo.
