UVIÉU, 20 d'Abril (EUROPA PRESS)
El conseyeru de Presidencia, Xusticia y Participación Ciudadana, Guillermo Martínez, destacó esti xueves na Cámara'l compromisu del Gobiernu asturianu col cumplimientu de la Llei de Memoria Histórica y manifestó que, reconociendo l'impulsu del grupu d'IU, el gobiernu siempre tuvo una fueya de ruta específica y mesma nesti asuntu.
Asina indicó que nesa fueya de ruta hai trés midíes concretes que'l Principáu quier llevar al cortu plazu y qu'inclúin la primer convocatoria de sovenciones y ayudes a proyectos d'investigación rellacionaos coles víctimes de la guerra civil y la dictadura. La iniciativa que va contar con 25.000 euros va dexar financiar estudios sobre fontes documentales y testimonios orales y la organización d'acciones de sensibilización y promoción de la memoria histórica n'Asturies.
Les otres dos midíes principales a cortu plazu pasen pela continuidá de los trabayos de la comisión d'espertos encargaos de la ellaboración del catálogu autonómicu de buelgues y muertes y la firma d'un conveniu cola Universidá d'Uviéu pa l'actualización del mapa de fueses comunes y la base de datos de les víctimes.
El conseyeru respondía asina a una interpelación de la diputada del Grupu Parlamentariu d'IU, Concha Masa qu'aseguró que nel Principáu d'Asturies queda munchu trabayu por facer nesta materia. Asina foi repasando les distintes midíes comprometíes, dende la revisión de los caleyeros de les ciudaes asturianes hasta l'apropiada señalización y protección de los llugares d'enterramientu de los republicanos asturianos asesinaos, o'l bancu de datos de AND de les víctimes ente otres cuestiones.
