UVIÉU, 17 de Payares (EUROPA PRESS)
La Xunta de la Facultá de Filoloxía de la Universidá d'Uviéu va someter a votación el próximu xueves la propuesta sobre la nueva ufierta de titulaciones del decanu, José Antonio Martínez, qu'inclui un total de cinco títulos de grau (actuales carreres), ente les que va tar, como principal novedá, un Minor d'asturianu (bloque d'asignatures que va sumar un total de 48 creitos).
Los profesores tán convocaos a les 10.30 hores a una sesión na que van tener que decidir si acepten o refuguen la nueva configuración que propón el decanu, como alternativa a la propuesta de l'anterior responsable del cargu, Ana Cano. Naquella ocasión incluyíase la posibilidá de cursar dientro del Maior del títulu de grau Llingües Modernes, un bloque d'asignatures d'asturianu como Llingua A, que sumaba un total de 72 creitos, o bien otru de 42 creitos, como LLingua B, o como Minor. La propuesta aprobóse de primeres, pero dempués tamién s'aprobó una enmienda del profesor Félix Fernández de Castro contraria a la ufierta d'asturianu, lo que provocó la dimisión de la responsable de la Facultá.
La propuesta agora presentada, y que los profesores yá estudien, plantega la creación de cinco títulos de grau: Llingua Española y les sos Lliteratures, Estudios Ingleses, Estudios Clásicos, Llingues y Lliteratures Romániques y Comparaes, y Llingues y Lliteratures Modernes. Caún d'estos títulos va tener el so Maior correspondiente. Nel casu de Llingües Modernes, dientro del Maior, los alumnos van tener qu'elixir una Llingua A y otra Llingua B, que van poder ser francés, italianu, portugués o alemán. Francés, italianu y portugués, tamién puen estudiase dientro del títulu de Romániques.
Cada alumnu va tener que combinar el so Maior con un Minor, que podrá ser del mesmu idioma o d'ún diferente. Ye na ufierta de Minores na que va figurar el de Llingua Asturiana, que va poder cursase en cualquiera de los cinco títulos y que va constar como tan nel espediente del estudiante.
Asina, pues, la propuesta del decanu plantega'l mesmu númeru de titulaciones actuales de Filoloxía, cinco, calteniendo la hispánica, la románica, la inglesa y la clásica, y tornando la de francés nun títulu de Llingües Modernes, con un mayor abanicu de posibilidaes.
No referente al asturianu, el nuevu Minor diba sustituyir al actual títulu propiu d'Espertu o Especialista, que la Facultá ofrez fuera de la ufierta de la carrera, como un cursu de postgrau posterior a la titulación. Estos estudios son los que nesti momentu s'exixen a los filólogos y maestros pa poder inscribise nes bolses de trabayu de profesores de Llingua Asturiana n'enseñanza primaria y secundaria.
Cola solución plantegada por Martínez, nun diba desapaecer de primeres nengún idioma de los presentes na Facultá, si bien diba quedar por esclariar el futuru de delles llingües ensin titulación pero que cuenten con dalguna asignatura, como ye'l casu del árabe o'l catalán.
La propuesta va tener d'aprobase por mayoría simple, existiendo sicasí la posibilidá de presentación d'enmiendes. Fernández de Castro ya manifestó la so intención de volver presentar una alegación, pa que la opción del Minor d'asturianu se vote separada del restu de la proposición del decanu.
