UVIÉU, 14 de Xunetu (EUROPA PRESS)
Profesores del Seminariu de Filoloxía Asturiana de la Facultá de Filoloxía de la Universidá d'Uviéu consideren que la ex decana, Ana Cano, nun trató d'acordar la so propuesta col restu de profesores asturianistes, lo que motivó la perda de consensu, y la posterior aprobación de la enmienda de Félix Fernández de Castro, que suprimía al asturianu del 'maior' de Llingües Modernes. Esta decisión provocó la dimisión de la decana.
Nun se trata sin embargu d'un puntu de vista unánime. Otros profesores entienden que'l resultáu de la votación foi circunstancial y que les propuestes yeren mui conocíes por toos.
Ramón d'Andrés, miembru del Seminariu y ex direutor de la Oficina de Política Llingüística del Principáu, considera qu'Ana Cano "ocupó munchu tiempu en fortificar el so reductu asturianista, compuestu por ella y unos tres profesores afines a l'Academia de la LLingua, marcando distancies col restu de profesores asturianistes del seminariu". Al so xuiciu, "llevó los temes del asturianu a espaldes de la xente, lo que provocó mal ambiente ente asturianistes, pero tamién ente'l restu del profesoráu".
Acusó a la ex decana de desarrollar "un papel esclusivista que tien muncho que ver col so papel políticu de presidenta de l'Academia". Al so xuiciu, estos aspeutos evitaron la busca d'un consensu col seminariu pa formular una propuesta asumible pol restu de profesores.
Según Juan Carlos Busto Cortina, miembru del seminariu, la propuesta de Cano "plantegóse en términos de tou o nada". "Si se plantegara un 'mínor' n'asturianu, pudiera algamase dalgo", afirmó. "Hubo xente que votó a favor de la enmienda de Fernández de Castro, y que dixo que votare a la escontra si se dexare nun 'mínor' d'asturianu", añadió.
Dende'l so puntu de vista, los conocíos enfrentamientos ente los profesores del Seminariu de Filoloxía Asturiana y los cercanos a l'Academia de la Llingua, tuvieron dalgo que ver na presentación d'esta "propuesta pesllada". "Ente la xente del seminariu hai puntos de vista distintos, muncha diversidá, y ente la xente de l'Academia non, porque ente ellos prima la unanimidá en casi tou", afirmó.
"Hai xente que nun ye asturianista pero ve l'asturianu con bonos güeyos. Sin embargu, pal sector de l'Academia tou ye oficialidá y oficialidá; eso probablemente xeneró mieos o refugu", finó.
Taresa Fernández Lorences, miembru del Seminariu, apoyó la propuesta d'Ana Cano por "coherente". Sin embargu entiende que "hai que ser consciente de qu'hai un equilibriu de fuerces dedicáu na Facultá sobre la llingua, y ye como pa tratar el tema con munchu cuidáu a fin d'evitar que se tomen decisiones como la que salió", matizó.
Dende'l so puntu de vista "les persones del Seminariu contamos poco o nada pal Decanatu, porque hai un distanciamientu", que pue tar motiváu "por que esta persona combine los dos cargos", en rellación a Cano, por ser decana y presidente de l'Academia.
DISCORDANCIES.
Xoxé Lluis García Arias, ex presidente de l'Academia de la Llingua, y mui próximu a Ana Cano na Facultá, considera que na votación "faltaron munchos profesores favorables al asturianu, y otros dieron un votu malintencionáu de castigu a la decana".
Refuga les crítiques de falta de consensu hacia ella, porque "nun se buscó un consensu con naide, nin lo referente al asturianu, nin nengún otru tema". "El decanatu formuló la so propuesta de manera independiente pa evitar presiones y nun tar suxetu a intereses gremiales", añadió, sentenciando que "se fizo al marxe de grupos de presión".
Nesti puntu, recordó que na comisión qu'ellaboró les propuestes d'estudios pa los títulos de grau "había polo menos un miembru del llamáu Seminariu de Filoloxía, al que se-y entrugó si-y paecía bien lo que plantegaba'l Decanatu y respondió afirmativamente".
Niega amás que la propuesta decanal fuere ellaborada con miembros de l'Academia de la Llingua. "Eso ye una babayada, porque yo, por exemplu, nun foi consultáu en nengún momentu", finó.
Pela so parte, Xulio Viejo, miembru del Seminariu, atribúi'l resultáu de la votación a cuestiones circunstanciales. Reconoz que "ye evidente qu'hai diferencies clares ente los profesores del Seminariu y los próximos a Ana Cano, pero nun se vieron espeyaes na Xunta, porque toos apoyamos en bloque la propuesta d'Ana Cano".