UVIÉU, 3 de Xunetu (EUROPA PRESS)
El presidente en funciones y candidatu socialista a la reelección Javier Fernández, anunció esti vienres que la próxima selmana va convocar a les fuerces polítiques de la izquierda pa buscar un acuerdu que dexe llograr un gobiernu d'izquierdes centráu na creación d'empléu, les polítiques de bienestar social y la llucha contra la corrupción.
Fernández manifestóse asina en produciéndose la segunda votación na Xunta pa la elección de presidente y dase un empate a 14 apoyos ente los candidatos socialista y popular, Javier Fernández y Mercedes Fernández, dempués de que los trés diputaos de Foru apoyaren a la candidata del PP.
Javier Fernández indicó que lo qu'asocedío na votación tien una esplicación cenciella y lóxica que nun ye otra que "la derecha arrexuntóse".
"Más allá de la incoherencia que puea pensase en relación a Foru Asturies y les polítiques de Rajoy con esta comunidá, a mi paezme coherente que la derecha s'arrexunte, a naide tien qu'estraña-y", dixo Fernández, qu'añadió que "lo que nun se llogró ye que lo faiga la izquierda".
"IRRESPONSABILIDÁ D'IU"
El voceru de Podemos, Emilio León, culpó pela so parte a la irresponsabilidá" d'Izquierda Unida de que la candidata del PP, Merced Fernández, "tea más cerca que nunca de gobernar Asturies".
León puntualizó qu'esta situación yera la que Podemos "trató d'evitar" presentando la so candidatura na primer vuelta. Afirma que lo alvirtieren a IU de que yera lo que podía asoceder, si la formación liderada por Gaspar Llamazares nun-yos daba'l so apoyu, pa que pasaren namás Podemos y PSOE a la segunda vuelta. "Esto esplicámoslo más claro que nunca a IU, que cometió la irresponsabilidá de nun dar los sos votos a la candidatura de Podemos", criticó León.
No referente a la posibilidá de llegar a una cuerdo col PSOE, esplicó qu'esto resuélvese "con compromisos serios, o buscando atayos con socios débiles y acuerdos en pasiellos, dando la espalda a la mayoría", añadió. Dexó claro que si los socialistes quieren el so apoyu, tienen que comprometes a dar un xiru de 180 graos y a nun aplicar les polítiques de Rajoy n'Asturies.
Gaspar Llamazares, voceru d'IU, mostró la so disposición a buscar un acuerdu, pero fizo un llamáu al Gobiernu socialista y a la Federación Socialista Asturiana (FSA), porque son ellos los que tienen que liderar esa "negociación imprescindible".
