UVIÉU, 26 de Xunu (EUROPA PRESS)
El voceru axuntu del Grupu Parlamentariu Socialista na Xunta Xeneral del Principáu, Marcelino Marcos Lindez, reprochó esti llunes a los grupos de la oposición la so "falta de cortesía" y la so "desconsideración" al criticar el nomamientu de Fernando Lastra como conseyeru d'Infraestructures, Ordenación del Territoriu y Mediu Ambiente tres la dimisión de Belén Fernández.
En declaraciones a los medios al cabu de la reunión de Xunta de Voceres, Marcos Lindez incidió nel "talante dialogante" que demostró Lastra na cámara autonómica y que, diz, "siempre" tuvo reconocíu pol restu de diputaos.
Amás, foi especialmente caltriante con IU, al retrucar a la formación d'ziquierdes les sos reticencies hacia Lastra cuando suelen pidir más "perfil políticu" a los miembros del Gobiernu autonómicu, al considerar que'l nuevu conseyeru d'Infraestructures "cumple perfectamente" esi requisitu.
El voceru axuntu de los socialistes punxo l'acentu, igualmente, na conocencia de Lastra sobre les materies de la so Conseyería al llevar temes d'infraestructures na Cámara asturiana.
Pa Marcelino Marcos Lindez, Lastra, que foi voceru parlamentariu del PSOE dende'l 2004, dispón tanto de conocencia de los llabores de gobiernu como la conocencia política necesaria pa cumplir cola so nueva responsabilidá.
Amás, negó "l'aislamientu" y la "debilidá" del Gobiernu qu'observen los grupos de la oposición y mostróse "optimista" ante la ufierta de collaboración realizada la selmana pasada pol presidente, Javier Fernández, a IU y Podemos para "dar estabilidá" al Executivu no que queda de llexislatura.
LOS GRUPOS CALTIENEN LES SOS CRÍTIQUES
Pela so parte, los grupos de la oposición caltienen les sos crítiques a la xestión del Gobiernu socialista y les sos reserves ante'l nomamientu de Lastra como sustitutu de Belén Fernández, conseyera que a la que reprobara'l plenu de la Xunta.
Mientres que la vocera de Foru, Cristina Coto, encamentaba esta mañana a Javier Fernández a dimitir y poner a otra persona al frente del Gobiernu o convocar elecciones, dende'l restu de grupos nun fueron tan lloñe pero sí esixeron cambios fondos nel Executivu o un xiru nes sos polítiques.
El diputáu del PP José Agustín Cuervas-Mons remarcó que la continuidá de Belén Fernández yera "insostenible" y espera que'l cambiu "valga pa esclarar y meyorar la xestión" nuna Conseyería con gran "complexidá".
Dende IU, el so voceru Gaspar Llamazares repitió que Javier Fernández "zarra files" en cuenta de "abrir" el Gobiernu p'ampliar los sos apoyos parlamentarios magar la "so situación precaria" na Xunta Xeneral. Llamazares insiste na necesidá d'una "renovación a fondu" del Executivu y considera que l'alderique sobre'l cambiu de la Llei de Socesiones y Donaciones, esti vienres, va suponer "un puntu d'inflexón" que va facer decidir al PSOE si rectifica y sumase a les esquierdes o s'alloña d'elles pa dir "coles dereches".
Amás, Emilio León (Podemos) negó la posibilidá de "dar 100 díes de cortesía a un parlamentariu con trenta años d'esperiencia", señalando a Soxepsa, el Montepío o Xitpa "como los escándalos" que, cree, tán vinculaos a la dimisión de Belén Fernández y tamién a de Francisco Blanco, mientres el PSOE "bloquia" la oficina anticorrupción que propón la formación morada. León llamenta que'l Gobiernu socialista lleve meses como "interín" y esixe que se ponga a trabayar y dialogue pa solucionar los problemes de los asturianos.
El voceru de Ciudadanos, Nicanor García, llamentó "la falta d'ímpetu y emburrie" de Javier Fernández y el so Gobiernu pa sacar a Asturies de los sos problemes, xenerar empléu y actividá económico. "La situación del Gobiernu ye bien débil", señaló García, encamentando al PSOE a solucionar los sos problemes internos y evitar qu'afecten a la gobernabilidá d'Asturies.
