MADRID, 27 de Payares (EUROPA PRESS)
El presidente del Gobiernu, Mariano Rajoy, dixo compartir "la indignación" de los españoles polos casos de corrupción pero calcó en qu'esa corrupción ye una "parte pequeña" n'España y nun ta "xeneralizada". Ello ye qu'alertó del peligru d'estender una solombra de sospecha sobre tola clase política porque entós, dixo, namás va quedar espaciu pa "los salvapatries d'escoba", en referencia velada a formaciones como Podemos.
Nun plenu monográficu nel Plenu del Congresu sobre rexeneración democrática, Rajoy pidió nun "utilizar" la corrupción como "coartada" pa "desestabilizar" les instituciones. Al so entender, añadir a la corrupción el "infundiu" ye "peligroso" porque "sema una rocea xeneralizada qu'acaba cargando la culpa, non sobre la corrupción, sinón sobre la mesma democracia".
Nesti sen, el xefe del Executivu avisó de qu'algunos "empiecen xeneralizando la corrupción, culpen a tolos políticos, sigan cola mesma política y acábase señalando al sistema". "Y a partir d'ehí nun queda espaciu namás que pa los salvapatries de les escobes, col únicu programa políticu de barrer, coles consecuencies de toos conocíes", alertó.
FACER PEDAGOXÍA SOCIAL Y POLÍTICA
En delles ocasiones calcó que "nun existe" una "corrupción xeneralizada" y reclamó nun estender la sospecha de corrupción a tolos políticos españoles. "Pueo entender la crispadura ciudadana, puedo entender la rocea, porque les comparto, pero nin lo uno nin lo otru xustifica que se xeneralice la culpabilidá", repitió.
Na so opinión, España "nun ta corrompida". "España tien dellos corruptos que, afortunadamente, tamos sacando a la lluz. El restu, ta sano y convién recordalo", esclamó, abondando na idea de que nin España nin los españoles nin les sos empreses nin los sos trabayadores "tán contaminaos".
Por eso, Rajoy aseguró que ye preciso "facer daqué de pedagoxía social y política" pa nun contribuyir a que s'estienda la impresión de que too, absolutamente tou, ta corropmío n'España", na clase política y nos servidores públicos.
Sicasí, reconoció que la corrupción "tornó en noticia cotidiana de primer páxina n'España". "Ye la dieta cotidiana de los españoles", llamentó, magar dixo que bona parte de la impresión creada obedez a que los mesmos casos surden "tantes veces y mientres tantu tiempu" produciendo un efectu multiplicador".
TIENDE LA MANO AL CONSENSU NES MIDÍES ANTICORRUPCIÓN
En repasando la batería de midíes anticorrupción que recueye la Llei de control económicO-financieru de los partíos y la llei sobre l'Estatutu del Cargu Públicu, Rajoy tendió la mano a los grupos de la oposición p'algamar un acuerdu nesta materia y que les iniciatives tean en vixencia cuanto antes.
"Vamos procurar un acuerdu estensu pero, si nun fuera posible algamar, nun va quedame más opción, tovía llamentándolo, que cumplir col mio deber, esto ye, sacar alantre los proyectos de llei colos votos que mos confiaron el españoles", afirmó, p'avisar a los grupos que la xente nun va entender que'l Parlamentu dexe de tomar midíes eficaces contra la corrupción "por falta d'acuerdu" ente los grupos.
Según Rajoy, los españoles "quieren un acuerdu" y ofénde-yos les diferencies nesta materia ente los partíos y que torne en "arma de disputa política". "Paez-yos estúpido que, como diz la fábula, debatamos sobre 'si son galgos o si son podencos' cuando lo qu'importa ye que son perros", recalcó.
A lo último, el presidente del Gobiernu aseguró ante los diputaos que tán bien les lleis y reformes pero, penriba de too, tienen el deber de ser "exemplares". "No qu'a mi respecta, los españoles saben que tienen el mio compromisu permanente enriba de la mesa", declaró.
