UVIÉU, 15 d'Avientu (EUROPA PRESS)
L'asociación Reciella presentó la programación de la cuarta edición de 'Escenines', el festival infantil de teatru y artes escéniques que cada añu entama coincidiendo coles vacaciones de Navidá.
Van ser un total de trés obres y dos conciertos representaos nesta ocasión nos dos escenarios dispuestos, unu nel Centru Cultural Antiguu Institutu y otru nel salón d'actos del Colexu Públicu Xovellanos, dambos en Xixón.
Les actividaes van dar entamu'l día 26, a les 12.00 hores, nel CP Jovellanos, cola celebración de la segunda edición de 'Bestiariu', que va valir pa presentar el CD del mesmu nome, nel que 12 grupos de música canten cantares infantiles n'asturianu. Van participar miembros de los conxuntos implicaos nel proyectu y les actuciones van tener a los animales como filu conductor.
El xueves 29, de magar les 19.00 nel Antiguu Institutu, va presentase la versión n'asturianu del llibro-discu 'Pulgarina, d'Alicia Álvarez, con ilustraciones d'Alicia Varela.
El 2 de xineru, nel mesmu llugar, de magar les 12.00 hores, va celebrase la representación de 'Retalinos, " al cargu d'Olga Cuervo y David Varela, onde los protagonistes son una muñeca de trapu y un güeglu que vive con ella".
La compañía Hixénicu Papel va llevar al escenariu del CP Jovellanos el día 3 a les 19.00 hores la obra 'Casa', que narra les aventures d'Andrés y la so familia na nueva casa a la que se mudaron. A lo último, el día 4, nel mesmu llugar y a la mesma hora, va ser la vez pa la compañía Nun Tris, que va representar 'Runa', na qu'una actriz va ofrecer un viaxe polos cinco continentes, al traviés de cuentos y narraciones.
