MADRID, 19 de Xineru (EUROPA PRESS)
Antonio Crocetta, el xefe d'unu de los equipos de rescate que trabayen nel hotel Rigopiano, asitiáu na población de Farindola, nel centru d'Italia, y que quedó'l miércoles enterráu por un argayu de nieve, aseguró qu'hai "munchos muertos" nel interior del establecimientu.
"Hai munchos muertos", afirmó Crocetta, en declaraciones a l'axencia de noticies Ansa. Nel momentu del ádene de nieve, provocáu polos terremotos rexistraos el miércoles na zona, nel interior del hotel alcontrábense polo menos 22 persones.
Los equipos esplegaos na zona llograron rescatar a dos persones nel esterior del hotel, una d'elles con síntomes d'hipotermia y a la qu'hubo que treslladar n'helicópteru a un hospital. Alcuéntrase firida n'estáu grave pero la so vida nun cuerre peligru.
Los testigos de los fechos relataron que l'hotel sufrió un ábanu de nieve d'una fuerza inaudita nesa zona. Hasta'l llugar de los fechos los bomberos movieron un helicópteru pa evacuación.
Los primeros equipos de rescate nun llegaron a la zona del hotel hasta pasaes les 4.00 hores, y una vez ellí llograron salvar a dos persones, identificaes como Giampiero Parete y Fabio Salzetta, que taben fuera de les instalaciones nel momentu del argayu, según el diariu 'Il Corriere della Sera'.
Los dos abellugáronse nun vehículu cerca del hotel tres l'ábanu y el so estáu de salú ye bonu, según confirmaron los equipos de rescate.
El Cuerpu Nacional de Socorru Alpín y Espeleolóxicu (CNSAS) foi'l primeru en desplazase hasta'l llugar, dempués de recibir un mensaxe nel que dos persones pidíen ayuda y alertaben de que taben "morriendo de fríu".
El centru d'Italia viose golpiáu por una serie de terremotos. Cuatro d'ellos superaron la magnitú de cinco na escala Richter. Toos ellos rexistráronse nuna zona próxima al epicentru del terremotu del pasáu 24 d'agostu n'Amatrice, nel qu'hubo cerca de 300 muertos.
El primer temblón, de 5,3 de magnitú, prodúxose a les 10.25 y na hora siguiente hubo otros dos de 5,4, y 5,3 graos. A les 14.33 prodúxose un nuevu temblón de 5,1, según l'Institutu Nacional de Xeofísica y Vulcanoloxía (INGV). Amás, hubo decenes de retruques de menor intensidá, dalgunes penriba de 4.
