UVIÉU, 23 de Xineru (EUROPA PRESS)
La xunta d'esti vienres de la comisión de la Xunta Xeneral del Principáu d'Asturies qu'investiga la xestión de los fondos mineros y la supuesta fortuna tapecida del líder sindicalista mineru y socialista José Ángel Fernández Villa acabó con un fuerte enfrentamientu ente'l presidente de la comisión, Ignacio Prendes (UPyD), y el voceru del PSOE, Fernando Lastra.
Una vez terminada la xunta, Lastra reprochó-y a Prendes que nun sabía fcaer el so trabayu como presidente de la comisión, mientres que Prendes respondía-y que conocía'l so llabor perfectamente, anque llevara munchos menos años que'l socialista na Xunta Xeneral.
Esti tipu de xuntes son a puerta zarrada pa la prensa. Tamién se zarraron les puertes cuando los dos parlamentarios engarráronse nesti discutiniu al rematar la xunta, pero l'altu volume del discutiniu fizo que los periodistes pudieren sentir dende los pasiellos los sos reproches mutuos.
La tensión siguió tamién nes declaraciones a los medios de comunicación que ficieron depués nos pasiellos de la Xunta Xeneral. Pero les versiones d'ambos diputaos nun coincidíen sobre lo qu'asocediera.
La xunta convocóse esti vienres, un día dempués de que trescendiera a la opinión pública que la muyer de José Ángel Fernández Villa rexistrara un escritu con un informe médicu adxuntu nel qu'afirmaba que'l so home nun ta en condiciones de comparecer ante la comisión a la que taba citáu, esti llunes a les 9.30 hores.
Prendes esplicó que lo que fizo la comisión foi dase por enterada del citáu informe y que va esperar al propiu llunes, cuando tamién va declarar la muyer del exsindicalista, pa tomar una decisión sobre si considera xustificada o non l'ausencia de Villa. De nun vela xustificada, tendríen que dirixise a Fiscalía porque supondría un posible delitu de desobediencia.
La posición del PSOE, según esplicó Prendes, yera que fuera güei cuando s'adoptara la decisión de xustificar esa ausencia, a la lluz del informe médicu. Sicasí'l restu de grupos con representación na comisión nun apoyó a los socialistes y el PSOE quedó solu. Los diputaos tomen asina conocencia de la comunicación, pero nun dan tovía por xustificada l'ausencia de Villa. Prendes esplicó amás qu'esti puntu votóse na xunta de la comisión.
"Ye lo que güei acordamos y decidimos; había otra posición, la del PSOE, que yera la de dar por xustificada güei la non presencia de Villa, pero nun salió alantre", señaló Prendes. Sobre'l grau de tensión na xunta, el presidente de la mesma llendóse a dicir que ye "una comisión bien viva".
CRÍTIQUES DEL PSOE
Sicasí, visiblemente molestu, el voceru del PSOE, Fernando Lastra negó la versión de Prendes al que llegó a llamar "mentiroso". A xuiciu del socialista, el diputáu d'UPyD "nun sabe facer el so trabayu". Lastra dixo qu'él namás escuchó y entendió'l conteníu del informe, rexistráu'l día 16 de xineru.
Según Lastra, Prendes nun quier facer cumplir el Reglamentu de la Cámara y nun sabe dirixir l'asuntu pa encalzar al procedimientu afayadizu a la comisión. El voceru del PSOE acusó a Prendes de llindase a "contaminar" l'actuación de la comisión. "Nun sabe lo qu'hai que facer", manifestó, diciendo que Prendes tien una "estratexa manipuladora" que torna la comisión en "un circu".
Lastra, qu'esixó a Prendes "que se ponga nel so sitiu" amás, negó qu'hubiera votación alguna nel senu de la comisión y que'l PSOE tomara una posición. "Nun ye verdá, nun recuerdo votar nada", y insistió en que nun votó en contra de nada.
FORU ACUSA AL PSOE D'ATRABANCAR LA COMISIÓN
Sicasí, otra de les diputaes que formen parte de la comisión, Esther Landa (Foru) confirmó a Europa Press la versión de Prendes y dixo que sí hubo una especie de votación. Lo qu'asocedió na comisión, esplicó, ye que Prendes plantegó al restu de miembros dar por recibíu l'informe médicu. Toos tuvieron d'acuerdu, pero nesi momentu Lastra faló y dixo que quería que constara que'l PSOE asteníase, según esplicó Landa.
Según la diputada de Foru, Lastra tuvo "bien nerviosu" na comisión y tuvo "salíes de tonu crecientes". Según Esther Landa, nun ye la primer vez qu'asocede y Lastra ta "atrabancando" de cutio la comisión. Cree que pretende "españar".
Per parte d'IU, el diputáu rexonal Aurelio Martín asumió que Fernández Villa nun va comparecer y, sin entrar en discutinios, pidió a la familia del sindicalista mineru que dea esplicaciones nel parlamentu, porque-y lo debe a "la sociedá asturiana".
IU considera que l'informe que fizo llegar al Parlamentu la familia de Villa ye más completu qu'otru qu'envió n'otra ocasión y que-y permitió evitar comparecer nuna comisión ordinaria del parlamentu asturianu. Según Aurelio Martín, aquel informe contenía "tachadures y fueyes en blancu".
Mientres, el diputáu del PP Fernando Goñi dixo que-y llama l'atención que Villa tea incapacitáu agora pa comparecer. "Nun sé si cuando fizo lo que fizo tamién tenía esa enfermedá", comentó.
Dende'l PP, sicasí, considera que si nun pue comparecer sí podría emitir per escrito orientáu a la comisión dando la versión de los fechos. "L'actor principal, la persona que regularizó una cantidá superior al millón d'euros, agora resulta que nun ye capaz de dar una esplicación", añadió.
