MADRID, 23 de Marzu (EUROPA PRESS)
La negociación ente los sindicatos d'estibadores y la patronal Anesco sobre los aspectos llaborales de la reforma del sector que promueve'l Gobiernu entró en 'vía muerta' esti xueves, en presentando la organización empresarial una propuesta que, según los representantes de los trabayadores, "imposibilita l'acuerdu" porque "topeta frontalmente" col oxetivu del caltenimientu del empléu.
Asina lo indicó al cabu de la xunta, de malpenes hora y media de duración, el dirixente de Coordinadora de Trabayadores del Mar, Antolín Goya, qu'indicó que les empreses plantegáren-yos "cambiar prácticamente tol conveniu colectivu y les actuales condiciones llaborales del sector".
Pal dirixente de los estibadores, "el Gobiernu, al asegurar que nun se pue garantizar por llei la subrogación de los trabayadores, dio una oportunidá d'oru a les empreses", que dicen que "namás si los sindicatos cumplen lo que proponen, van plantegar si subroguen o non a los estibadores".
Sicasí, pa los sindicatos, la propuesta de la patronal "pon de manifiestu" lo qu'ellos vienen defendiendo, la necesidá de garantizar por llei l'empléu del sector. Por ello, insistió en solicitar al Gobiernu que "si de verdá quier garantizar l'empléu, que diga cómo lo va a faer", "Les empreses yá lo ficieron", indicó de forma irónica Goya.
Del so llau, el director xerente d'Anesco, Pedro García, llendóse a indicar que cola so propuesta, les empreses namás busquen garantizase "la dirección y organización efectiva de los sos trabayos".
Tocantes a les midíes plantegaes poles empreses, los sindicatos aseguren que tornen nuna "disponibilidá" plena de los estibadores, la posibilidá de que cambien o compartan llabores, un descensu del 30% nos costos "y alteraciones nos réximes de descansu".
