UVIÉU, 9 Jun. (EUROPA PRESS) -
El presidente de l'Academia de la Llingua Asturiana, Xosé Antón González Riaño, afaló a la ciudadanía a apoyar toles iniciatives que busquen "l'alcuerdu llingüísticu" y a ser "respetuosu" con toles opciones d'oficialidá qu'ufran les estremaes fuercies polítiques.
Asina lo afirmó Riaño nel pregón de la Fiesta de la Oficialidá, que se celebró esti sábadu en Bimenes y onde tuvieron presentes políticos como'l secretariu xeneral de la FSA, Adrián Barbón, ente otros.
El presidente de l'Academia recordó que Bimenes foi'l que "marcó'l camín" al ser el primer conceyu que declaró la oficialidá nel so territoriu. "Un camín y un enfotu que lleva a la xusticia llingüística porque queremos ser ciudadanos con plenos derechos culturales como los que prevee la Constitución y como los que se punxeron en xuegu en tolos otros pueblos d'España con llingua propia", dixo.
La falta d'oficialidá ye pa Riaño una "anomalía constitucional", anque dexo claro qu'esti marcu llegal "ta ehí y vamos llogralo bien ceo". "Sabremos facelo democráticamente, xugando col máximu consensu y teniendo en cuenta que la llingua nun pertenez n'esclusiva a nenguna opción política, sinón que ye un patrimoniu cultural de tolos asturianos", señaló.
Una oficialidá qu'ha garantizar el derechu a usar la llingua d'Asturies, "non la so imposición a la ciudadanía que quiera siguir espresándose esclusivamente en castellanu", afirmó, p'afalar a la sociedá a apoyar toles iniciatives que'empobinen "al alcuerdu llingüísticu y respetuosu con toles opciones d'oficialidá qu'ufran les estremaes fuercies polítiques".
"Nun hai un únicu modelu na puesta en práctica de la oficialidá", dixo Riaño, p'añadir que del debate ha xurdir una propuesta "realista, factible y afayada a la realidá asturiana, una propuesta qu'ha ser la que toos habemos d'asumir".
