UVIÉU, 28 de Marzu (EUROPA PRESS)
El Conciertu pola Oficialidá contará esti añu cola actuación del músicu Rodrigo Cuevas, que llevará'l so espectáculu al recintu instaláu pa la ocasión nel Parque Inglés de Xixón, el 17 de xunu a les 19.00 hores.
Nuna nota de prensa, la Xunta Pola Defensa de la Llingua informa tamién d'otra novedá d'esti añu. Pela tarde va preparase una adaptación de les existoses 'Nueches en danza' pal horariu vespertín, onde los grupos Caldo y Os Rabizos, Herbamora y Cantaruxare van ufrir una actuación mui especial na que tolos asistentes van poder baillar y blincar colos nuestros sones más tradicionales.
Nesta XXIX Conciertu pola Oficialidá tamién va actuar*Rodrigo Cuevas, l'artista de más sonadía dientro del panorama de la escena sonora asturiana, que pela primer vez pa ufrir el so espectáculu nel escenariu musical-reivindicativu del Conciertu pola Oficialidá.
A estos nomes súmense los de La Kadarma, formación naveta que nos últimos años ta revolucionando'l mundu de les bandes de gaites; los l.lenizos Spanta la Xente, ún de los grupos de más sonadía de los Valles Mineros; Dixebra, "tou un clásicu que tán de xira de conmemoración de los sos trenta años; y los moscones*Misiva, una banda de punk-rock con una bona montonera de conciertos al llombu", señala la Xunta.
El Conciertu pola Oficialidá ye un conciertu reivindicativu entamáu pola Xunta pola Defensa de la Llingua Asturiana pa reclamar la oficialidá pal asturianu. Vien celebrándose dende 1989 en dellos llugares de la xeografía asturiana. Nos díes vinientes van anunciase los sitios onde va poder mercase la entrada.
