MADRID, 17 d'Avientu (EUROPA PRESS)
L'empresariu catalán Juan Rosell resultó reelexíu esti miércoles presidente de la CEOE pa un segundu y últimu mandatu por 345 votos de los 660 emitíos (52,2%). Va cuatro años, Rosell salió escoyíu con un apoyu del 62,5% nel so enfrentamientu col andaluz Santiago Herrero.
El so rival nestes elecciones, el presidente de Cepyme, Antonio Garamendi, llogró 312 votos. Amás, emitiéronse trés votos en blancu y nengún nulu.
El resultáu de los comicios conocióse pocu dempués de les 13.00 hores, metanes un ambiente d'espectación. La participación raspió'l 86%.
Los dos candidatos recibieron la noticia en primer fila de l'Asamblea Electoral, celebrada nel Palaciu Municipal de Congresos.
Rosell, nacíu en Barcelona en 1957, presentóse a les elecciones con un programa tituláu 'CEOE 2015-2018: Futuru y propuestes concretes', nel que condensa los oxetivos pa los próximos cuatro años.
En materia de relaciones llaborales, Rosell apuesta por introducir más flexibilidá, simplificar les modalidaes de contratos, potenciar el salariu variable con oxetivos definíos y amenorgar el papeléu tocantes a contratos, recibu de salariu y notificaciones ente les partes.
L'empresariu catalán ta convencíu de que la negociación colectiva tien qu'averase más a les necesidaes diaries de les empreses, especialmente de les pymes, y apuesta por elevar les hores estraordinaries, mayor adaptabilidá na distribución de xornada y axustar la movilidá funcional.
Tamién Rosell apuesta por amenorgar la carga fiscal que soporten les empreses per mediu d'una rebaxa de cotizaciones, hasta los niveles del entornu europeo, por reformar el modelu de formación profesional pal empléu, partiendo del protagonismu de les empreses, y por optimizar la collaboración coles mutues y insistir na so naturaleza privada.
