MADRID, 25 de Mayu (EUROPA PRESS)
Pedro Sánchez refuga la posibilidá de faese con un escañu nel Senáu pa ponese al mandu de la oposición parlamentaria al Gobiernu, una vez que dimitió como diputáu y nun tien asientu nel Congresu, de manera que va caltenese namás como secretariu xeneral del PSOE.
Dende qu'entamó'l procesu de les Primaries socialistes especulóse nel Senáu cola posibilidá de que dos de los trés aspirantes al cargu, Susana Díaz y Pedro Sánchez, buscaren al tornar en secretariu xeneral un asientu nel Senáu, puesto que nun son diputaos, condición que sí tien el tercer candidatu, Patxi López.
Una vez escoyíu secretariu xeneral, y puesto que dimitió como diputáu pa nun astenese na investidura de Mariano Rajoy, Sánchez refugó sicasí volver a les Cortes al traviés del Senáu, como uno de los 58 senadores que designen los parlamentos autonómicos y nun s'escueyen nes elecciones xenerales.
Según esplicó esti miércoles nuna conversación informal colos periodistes, la razón principal ye que nun podría ocupar escañu autonómicu pola Asamblea de Madrid, la que-y correspondería como madrilanu que ye. Nesta comunidá, exíxese pa llegar al Senáu ser diputáu rexonal y Sánchez nun lo ye.
SENADOR POR OTRA COMUNIDÁ
Esti fechu provocó les especulaciones estos díes pasaos nos pasiellos de la Cámara Alta, onde senadores de tolos partíos preguntábense si dalgún compañeru socialista tendría que dexar el so escañu al nuevu líder, anque'l númberu de candidatos baxó a unes poques comunidaes: Castiella y Lleón, Castiella-La Mancha, Aragón, Galicia y Baleares.
Les demás, o esixen ser diputáu autonómicu o "gozar de la condición política" d'esa comunidá, como ye'l casu de Cataluña, Andalucía, Navarra o Asturies.
La llegada al Senáu permitiría a Sánchez caltener un 'cara a cara' al mes col presidente del Gobiernu. Mariano Rajoy acude mensualmente a la Cámara Alta pa responder a trés entrugues de la oposición nel Plenu, una d'elles siempre del PSOE. Pero'l presidente nun ta obligáu a caltener esti compromisu porque nun lo recueye'l Reglamentu de la Cámara: ye xuna costume qu'estableció voluntariamente José Luis Rodríguez Zapatero y que los presidentes intenten caltener.
Dellos senadores socialistes aseguraben sicasí a Europa Press estos díes que Sánchez nun tien necesidá de buscar un escañu pa exercer el lideralgu y menos cuando tien que mover a un compañeru d'otra comunidá autónoma que nun ye la suya.
