BARCELONA, 24 de Mayu (EUROPA PRESS)
L'expresidente del FC Barcelona Sandro Rosell negó esti miércoles cometer el blanquéu de capitales pol que lu detuvieron el martes xunto con otres cuatro persones, y aseguró que ganó dineru "lícitamente".
Asina lo esplicó a los periodistes el so abogáu, Pau Molins, dempués de declarar mientres trés hores ante la Guardia Civil y la Policía Nacional en Barcelona.
Tres esta declaración, treslládenlu a Madrid pa pasar a disposición de l'Audiencia Nacional el xueves, onde tien que declarar xunto con otros trés deteníos --tamién detuvieron a la so muyer, Marta Pineda, pero quedó en llibertá con cargos el mesmu martes, a la espera de que la cite la xueza--.
Pau Molins dixo que l'interrogatoriu a Rosell foi mui bien y que'l so defendíu "alcuéntrase perfectamente bien y con ganes d'esplicase" ante l'Audiencia Nacional, que coordina la investigación.
El lletráu asegura que "nun hubo blanquéu de capitales, porque se trata de dineru llográu lícitamente", y que'l blanquéu implica ingresos procedentes d'un delitu o dineru llográu irregularmente, lo cual negó.
Molins añedió que Rosell, antes de presidir el FC Barcelona, tenía una sociedá de marketing deportivu "y cobraba la so remuneración polos trabayos que facía. Ye llegal dafechu".
CINCO DETENÍOS EL MARTES
La Guardia Civil y la Policía Nacional detuvieron el martes a les cinco persones na operación Rimet, anque dempués dexaron en llibertá a la esposa del expresidente azulgrana.
Rosell y les otres trés persones que siguieron deteníos pasaron la nueche nel cuartel de Travessera de Gràcia de Barcelona, tres tou un día obsrevando rexistros.
Nel casu de Rosell, tuvo presente mientres casi diez hores d'inspección na so casa y depués en dos entraes más en Barcelona.
En tola operación, a lo llargo del martes ficieron les cinco detenciones más nueve entraes y rexistros en Barcelona, Lleida, Girona y Principáu d'Andorra; la mayoría, despachos profesionales.
Investígase'l supuestu blanquéu de capitales al traviés del cobru de comisiones ilícites polos derechos audiovisuales de la selección brasileña de fútbol per parte de los deteníos, a los que l'Audiencia Nacional atribúi tamién el presuntu delitu de pertenencia a organización criminal.
