MIERES/UVIÉU, 14 Abr. (EUROPA PRESS) -
El conseyeru de Sanidá del Principáu d'Asturies, Faustino Blanco, comprometióse colos alcaldes de la área sanitaria VII a "reforzar" los servicios del nuevu hospital Álvarez Buylla. Asina lo aseguraron esti llunes el rexidores d'Ayer, L.lena y Mieres, en calteniendo un alcuentru col responsable rexonal pa informase sobre los planes de reordenación del mapa sanitariu n'Asturies.
L'alcalde en funciones de Mieres, Manuel Ángel Álvarez (IX), destacó que se comprometió a poner en marcha, inclusive, "ciruxíes más complexes". "La nuesa máxima esmolición yera la perda de servicios y el treslláu de pacientes a Nalón, agora quedemos más seles", añedió l'alcalde de L.lena, Ramón Argüelles.
Tocantes a la hemodiálisis, el conseyeru caltuvo que'l serviciu va ufiertase al traviés de trabayadores de Cruz Roja. "Ye un serviciu que funciona asina dende siempres n'otros llugares y qu'antes nun teníamos en Mieres, asina que la nuesa valoración ye positiva", señaló l'alcalde d'Ayer, David Moreno (PSOE).
El rexidor en funciones de Mieres dexó claro que puede "llegar a entender" la visión del Principáu, pero que nun la comparte: "Lo ideal yera emplegar a personal público", destacó Manuel Ángel Álvarez.
Igualemente, punxo sobre la mesa la problemática colos accesos y recordó que'l conceyu "perdonó una delda de más d'un millón d'euros" a Sanidá col fin de consiguir unos accesos apropiaos" pal centru hospitalariu.
Pel momento, el conseyeru namáS comprometió una rotonda, "una entrada mínima pal hospital", pero'l responsable municipal de Mieres alvirtió de que nun s'escaecerán "del proyectu completu".
