UVIÉU, 29 Ago. (EUROPA PRESS) -
El presidente de la Xunta Xeneral del Principáu d'Asturies (XXPA), Pedro Sanjurjo (PSOE), insistió esti llunes na necesidá de "algamar alcuerdos y pactos" pa evitar "por tolos medios" la repetición d'eleiciones nacionales.
El representante manifestó esta postura enantes del discursu de recepción de los neños sah.aragüis del programa 'Vacaciones en paz' na Cámara autonómica, al entruga-y los periodistes pol alcuerdu d'investidura del Partíu Popular y Ciudadanos a nivel estatal.
"Espero que vayamos esclariando l'escenariu políticu nacional porque eso va ser beneficiosu pa tol Estáu, tamién p'Asturies. Vengo insistiendo nesta idea dende va tiempu", declaró.
Sanjurjo encamentó a averar posiciones "por tolos medios" pa que se busque una fórmula de Gobiernu", porque un Executivu nacional "daría estabilidá institucional que bien se necesita nel conxuntu del territoriu español".
"Independientemente de quien seya'l presidente del Gobiernu, nestos momentos fai falta tener un Gobiernu que faiga frente a les necesidaes que tien la ciudadanía, y lóxicamente, como nun pue ser d'otra forma en democracia, eso llógrase al traviés d'una mayoría. Pos quien tenga esa mayoría, que gobierne", matizó.
Sicasí, el socialista repitió que nun-y correspondía valorar los pautos ente partíos, una evaluación que "tienen de facer los mesmos partíos".
SISTEMA AUTONÓMICU D'ELEICIÓN DE PRESIDENTE
El presidente de la XXPA emponderó'l sistema d'eleición de Presidente autonómicu, porque esti "torga'l bloquéu institucional". Los diputaos rexonales tienen que votar a favor o abstenese. "Ye necesariu proponer un candidatu alternativu d'aquel qu'aspira a ser escoyíu, poro, nun ye posible votar en contra", esplicó.
"Nel so día foi bien criticáu, inclusive se llegó a teorizar que se llindaba la opción a votar non, güei ye una midida que garantiza la gobernabilidá y que bien podría ser tomada en consideración n'hipotétiques reformes del nuesu sistema políticu", defendió.
