UVIÉU, 7 Jun. (EUROPA PRESS) -
El Conceyu de Siero, en collaboración col Gobiernu d'Asturies, punxo en marcha'l 'Calendariu de la güerta n'Asturies', una iniciativa que quier fomentar l'usu del asturianu y poner en valor la tradición agrícola rexonal, al traviés de la edición de carteles y trípticos n'asturianu, nos que s'informa de manera gráfica de los tiempos de sema.
La campaña tien dos fases. La primera d'elles con carácter informativu, dirixida a la divulgación y conservación de la cultura material y inmaterial rellacionada col mundu agrariu asturianu, al traviés del repartu del calendariu del que s'editaron 500 carteles y 3.000 folletos. Nuna segunda fase, la campaña va llevase a los centros escolares del conceyu.
Los carteles y los folletos del 'Calendariu de la güerta n'Asturies' ufren información de la rellación ente les fases llunares y la sema, mesmo que de los meses nos que se recomienda semar y recoyer les hortolices y llegumes más frecuentes n'Asturies, hasta un total de 24.
El calendariu complétase con un refraneru vinculáu cola güerta, con dichos asturianos como "les fabes de San Xuan florecen y nun dan" o "mayu fai payar y agostu maizal" y llanza na portada'l mensaxe principal de la campaña: "Asturies ye un país de gran tradición agrícola. Agora, dende los nuestros conceyos queremos promover una vuelta a la tierra, recuperando les palabres y los conocimientos de los homes y muyeres depositarios de la tradición agrícola asturiana".
