Creen que'l conseyeru buscó una vía de negociación pal actual conflictu, pero "cortáron-y les ales dende arriba"
UVIÉU, 20 d'Abril (EUROPA PRESS)
El representante de la Federación d'Enseñanza de Comisiones Obreres, José Ángel Piquero, afirmó güei que'l Gobiernu asturianu nun convoca la mesa sectorial d'educación, demandada polos sindicatos d'enseñanza, porque la direición autonómica d'UXT "nun quier".
Piquero realizó esta afirmación demientres una rueda de prensa convocada pol so sindicatu, amás de Beatriz Quirós (Suatea), Gerardo Domenech (CSI-CSIF) y Gumersindo Rodríguez (ANPE) p'anunciar oficialmente la próxima convocatoria de fuelga de profesores na enseñanza pública asturiana, prevista pal 28 d'abril. La movilización exixe la convocatoria de la mesa xeneral y la retirada del plan d'evaluación del profesoráu, que se ta desarrollando nesti momentu, según los sindicatos, sin negociar con ellos.
Entrugáu polos periodistes polos motivos de que nun se convoquen la mesa sectorial na mesa xeneral de la función pública asturiana, el representante de Comisiones foi claru: "el gobiernu nun la convoca porque UXT nun quier". "Hai un sindicatu mui lligáu al Gobiernu que sin nenguna otra contrapartida baxóse de la fuelga cuando'l Gobiernu-y lo pidió", afirmó, en clara alusión a la retirada d'UXT de la convocatoria de la última fuelga, celebrada'l 1 d'abril. "Y cuando Justo Rodríguez Braga plantega que nun quier mesa sectorial, pues el Gobiernu nun la convoca porque UXT nun quier", añadió, refiriéndose a les declaraciones que ta acabante de facer el responsable autonómicu de la central, contraries a la creación de dicha sectorial.
Entrugáu pola postura de la direición xeneral de Comisiones Obreres sobre esta reivindicación del so sector d'enseñanza, Piquero explicó que la Federación d'Enseñanza claramente pide la mesa y la direición de CC.OO lo qu'exixe ye que "el Gobiernu lo faiga bien y que negocie colos sindicatos". "Per parte de la nuesa federación d'Alministración Pública", continuó, "que ye la que ta na mesa xeneral, nun diba haber nengún problema pa que se convocare la sectorial. La responsabilidá ye del Gobiernu. Que presente la propuesta, y veremos si Comisiones vota y si UXT vota, si hai mesa sectorial", señaló.
"CORTE D'ALES" A RIOPEDRE
Los sindicatos mostráronse per otra parte seguros de que'l conseyeru d'Educación, José Luis Iglesias Riopedre, tentó d'abrir una vía de negociación pa solucionar el conflictu, pero dende'l Gobiernu autonómicu "cortáron-y les ales". Básense pa ello na doble convocatoria que-yos llegó de la Conseyería pa un conceyu'l próximu miércoles.
"Primero", esplicó Beatriz Quirós, "llegó una primer convocatoria na que paecía que diba haber un desbloquéu de la negociación". Nella se fixaba una orde del día con tres puntos referentes a la mesa sectorial, el plan d'evaluación y el pagu del primer tramu de la carrera profesional. Sin embargu, "hores dempués llega otru fax con un nuevu orde del día", añadió la representante de Suatea. Nel mesmu sólo s'inclúi un puntu xenéricu sobre la xestión educativa.
"Nun sabemos si va llegar otru. Nós vamos asisitir cola primer fueya. Igual qu'equí al miércoles vuelve cambiar l'orde del día", afirmó Quirós.
La esplicación d'estes dos convocatories ta clara dende'l so puntu de vista: "el conseyeru tentó de desbloquiar la situación, tentó una pequeña vía de negociación y la conseyera d'Alministraciones Públiques, o dende más arriba, cortáron-y les ales. Mandáronlu parar. Nun sé si'l tirón d'oreyes vendría d'unllau o d'otru", señaló, apoyada pol restu de presentes na rueda prensa.
