CCOO diz que la recuperación ta sofitada "nel sufrimientu de los trabayadores accidentaos"
MADRID, 2 Sep. (EUROPA PRESS) -
CCOO y UXT alertaron sobre'l deterioru de les condiciones de trabayu n'España, sobre la falta de seguridá y salú llaboral nos puestos de trabayu y sobre'l desinterés de les empreses españoles por invertir en programes de prevención de riesgos llaborales, "yá que siguen considerándolos como un gastu en llugar d'una inversión".
Concretamente, el secretariu de salú llaboral y mediu ambiente de CCOO, Pedro Linares, afirmó esti llunes que "los raigaños fuertes de la recuperación económica", a los que fai referencia'l presidente del Gobiernu, Mariano Rajoy, "tán sofitaos sobre un aumentu del sufrimientu de los trabayadores accidentaos y les sos families".
Asina reaccionó'l sindicatu nun comunicáu depués de conocer los datos de siniestralidá llaboral del primer semestre de 2014, ufiertaos pol Ministeriu d'Empléu y Seguridá, qu'amuesen un aumentu xeneralizáu de los accidentes de trabayu nel conxuntu d'España y que confirmen, según CCOO, el deterioru de la prevención de riesgos llaborales.
Nesti sentíu, Linares afirmó que "estos datos non solo reflexen un deterioru de les condiciones de trabayu n'España, sinón que desmonten el discursu trunfalista del Gobiernu sobre la situación de la economía".
Asina, CC.OO. detalló que'l datu ye más esmolecedor teniendo en cuenta qu'esa medría manifiéstase de forma xeneralizada, tanto en términos absolutos como relativos, y en cuasi tolos sectores de l'actividá, independientemente de que seyan en xornada de trabayu o 'in itinere' y del so nivel de gravedá.
Concretamente, el númberu total d'accidentes con baxa nel primer semestre creció un 4,9% al respeutive del mesmu periodu del añu anterior, un 5,1% en xornada de trabayu y 3,3% 'in itinere'.
Nel casu d'accidentes mortales esperiméntense aumentos del 3,2% nel conxuntu de l'actividá, del 54,2% nel sector agrariu, del 35,5% na industria y el 6,9% na construcción. Namás amenórguense nel sector servicios (-15,5%). Los accidentes mortales 'in itinere' aumentaron un 20,5%.
Tocante a los índices d'incidencia (indicador más fiable pa midir la evolución de la siniestralidá), prodúcense medríes nel total d'accidentes independientemente del sector. Nel casu de los mortales hebo una medría del 1,9%, anque destaquen los aumentos nel agrariu (39%), na industria (36%) y na construcción (12%). Los servicios vuelven ser l'únicu sector que s'escapa d'esti enclín.
D'esta forma, Linares aseguró que "estos datos ratifiquen la hipótesis que los sindicatos vienen defendiendo dende va tiempu: la prevención de riesgos ta siendo la primer víctima de la falta d'inversiones nes empreses, de los retayos nes alministraciones públiques y de les polítiques neolliberales aplicaes polos distintos gobiernos".
"Estes postreres son les responsables d'una serie de tresformaciones del mercáu de trabayu español (aumentu del empléu temporal y a tiempu parcial, xunío a una elevada rotación nos puestos de trabayu) caracterizáu agora por una peralta precariedá que torga articular de forma afayadiza la prevención nes empreses", amestó.
UXT PIDE A LES AUTORIDAES QUE "ACTÚEN DARRÉU"
Pela so parte, UXT aseguró nun comunicáu que los datos "amuesen la falta de seguridá y salú llaboral nos puestos de trabayu n'España".
D'esta miente, UXT llamentó'l repique de la siniestralidá, que "confirma los peores badagüeyos denunciaos yá pol sindicatu, una y bones estes cifres reflexen grandes perdes humanes, de vulneración de derechos, de pasividá y falta de sensibilización".
Asina, la central sindical indicó que resulta "imprescindible" que les autoridaes dexen de mirar "pa otru llau" y "actúen darréu p'acabar colos accidentes de trabayu y les enfermedaes profesionales".
Coles mesmes, el sindicatu destacó que l'índiz d'incidencia --el númberu d'accidentes con baxa durante la xornada llaboral por cada 100.000 trabayadores espuestos al riesgu-- nesti periodu ye de 253,6 puntos, un 3,9% más qu'en 2013, aumentando en tolos sectores.
