UVIÉU, 30 d'Ochobre (EUROPA PRESS)
El númberu 101 de la revista Lletres Asturians, que publica l'Academia de la Llingua Asturiana, dedica bona parte de la so estensión a analizar diversos aspectos sintácticos, gráficos y de vocabulariu del lleonés y l'asturllonés medieval, amás d'otros temes d'estudiu, como la meteoroloxía popular da zona de Cabu Peñes.
El númberu presentólu güei Miguel Ramos Corrada, vicepresidente de l'Academia, demientres la rueda prensa de convocatoria oficial de les Xornaes d'Estudiu de la Llingua, que se desarrollarán la próxima selmana.
"La casi totalidá de los trabayos d'investigación son del ámbitu llingüísticu, de la gramática histórica y la dialeutoloxía", esplicó l'Académicu, "porque provienen de les xornaes del añu pasáu, titulaes 'Más de mil años d'historia nel país de los ástures', y onde les ponencies dedicáronse a esti ámbitu na so mayoría".
Así, alcontramos estudios sobre'l procesu de castellanización del sur del Cordal Cantábricu, les variantes diatópiques en documentos medievales lleoneses, la configuración de los usos gráficos romances nes escribaníes lleoneses demientres la Edá Media o l'asturianu-lleonés medieval na ciudá de Lleón nel primer terciu del sieglu XIV.
Amás, tamién s'inclúin otros estudios sobre la meteoroloxía popular nel Cabu Peñes, una estaya sobre cartes de Fermín Canella a Víctor Balaguer o a l'artículu 'A la gueta'l coritu, del Picu Coritu trubicu a la Eneida de Virxiliu', de Pablo Suárez García. Amás, faise un resume de la xornada del 'XXX Día de les Lletres Asturianes', que tuvo llugar nel pasáu mes de mayu, y inclúise la llista de premiaos nos concursos lliterarios de l'Academia 2009, amás d'un repasu a les últimes publicaciones.
Nel so entamu infórmase tamién de la firma de los convenios col Colexu d'Inxenieros y Softastur pa enanchar el léxicu informáticu y científicu del asturianu, y del acuerdu con Googlebooks, pa que'l fondu lliterariu de l'Academia tea na rede y pue consultase. Tamién se da conocencia d'un conveniu col Conceyu de L.lena pa la normalización de la llingua.
Ramos Corrada destacó que la revista "goza de bona salú", gracies al "bon facer de la so directora", la presidente de l'Academia, Ana Cano, y de los sos collaboradores y conseyu de redaición.