WASHINGTON, 18 d'Agostu (Reuters/EP)
L'asesor ideolóxicu de Donald Trump, Steve Bannon, va abandonar esti vienres el so cargu, según confirmó la Casa Blanca al traviés d'un comunicáu.
La naturaleza de la salida de Bannon tovía nun s'esclaró. Según confirmaron a l'axencia Reuters fontes cercanes a la decisión, tratárase d'un despidu inmediatu mientres qu'otres fontes próximes al asesor informaron a ABC News que Bannon decidió dimitir del cargu.
Bannon yera unu de los elementos más polémicos del so círculu internu d'ayudantes poles sos rupturistes idees ultranacionalistes y antigubernamentales, acabara nel puntu de mira tres les declaraciones del presidente onde se negó a culpar específicamente a grupos neonazis de la violencia la selmana pasada en Charlottesville (Virginia).
De primeres, el 'New York Times' informara de que Bannon apurrió la so dimisión a Trump el pasáu 7 d'agostu y la so salida del cargu diba anunciase esta mesma selmana. Sicasí, aplazóse pola violencia surdida nesta población.
El cese de Bannon dexa a Trump sin unu de los sos grandes baluartes de la campaña electoral y de los sos primeros meses na Casa Blanca, nun intentu de romper dellos vínculos colos movimientos ultranacionalistes y escapar del constante discutiniu qu'arrodió a la figura d'esti ex inversor de Goldman Sachs y ex director de la web ultraconservadora 'Breitbart News', unu de los órganos voceros de Trump ante la so audiencia antisemita y supremacista.
Bannon protagonizó enfrentamientos con prácticamente tolos integrantes del círculu más estrechu d'asesores del presidente, empezando col so xenru, Jared Kushner, l'ex xefe de Gabinete -- y representante del Partíu Republicanu -- Reince Preibus, o hasta les Fuerces Armaes y la comunidá d'Intelixencia, abatíes mientres el tiempu que Bannon, nel apoxéu de la so influencia, permaneció como miembru del Conseyu de Seguridá Nacional.
La salida de Bannon tien llugar tres la violencia de Charlottesvile, onde Trump tuvo que salir al pasu de les acusaciones contra Bannon, de quien aseguró que "nun yera un racista" hasta prácticamente acabar capitulando -- "yá veré lo que faigo con él", declaró ante los medios -- y dempués d'una entrevista publicada va dos díes na que Bannon tachaba de "xirigonza" la solución militar propuesta por Trump p'acabar cola crisis en Corea del Norte.
"Hasta que daquién resuelva la parte de la ecuación que me demuestre que diez millones de residentes de Seúl nun van morrer nos primeros 30 minutos (d'un hipotéticu entamu de les hostilidáes con Corea del Norte), equí nun hai solución militar que valga. Tiénennos garraos", declaró nel so momentu.
