UVIÉU, 29 Jun. (EUROPA PRESS) -
El sindicatu Suatea denunció qu'a lo llargo d'esta llexislatura, la situación del asturianu y del gallego-asturianu nel sistema educativu "reculó". Too eso a pesar del pactu de llexislatura ente'l PSOE y IX y al conseyeru Genaro Alonso, favorable a la normalización del asturianu.
Al traviés d'una nota de prensa, el sindicatu afirma que, llegando a la recta final de la llexislatura, "nun se respeten los derechos de la ciudadanía". Una situación que pa Suatea choca col compromisu del pactu d'investidura que comprometió al Gobiernu a meyorar la normalización llingüística enantes d'acabar la llexislatura-- y al nomamientu de Genaro Alonso como conseyeru d'Educación y Cultura.
Suatea recuerda que'l profesoráu d'asturianu tien mayoritariamente places inestables dende hai más de 25 años, "ensin que los partíos gobernantes fixeren nada pa cambiar esta situación", polo que proponen la oficialidá como camín pa crear la especialidá docente d'asturianu.
Amás, falen de que nestos tres años hubo una "precarización constante" de les condiciones llaborales de los maestros d'asturianu. Asina, afirmen que la "merma" de puestos nun se debe a una merma de la demanda, "sinón a la política prioritaria de recorte presupuestariu saltando perriba de los derechos de la ciudadanía".
Otra manera, indiquen que l'asturianu sigue ensin tar presente na Educación Infantil, n'Escueles Oficiales d'Idiomes, Dirección d'arte
drámaticu o Gaita dientro'l Conservatoriu Superior de Música.
Por eso, Suatea esixe al Gobiernu, al conseyeru Genaro Alonso y al director xeneral de Planificación Llingüística, Fernando Padilla, qu'actúen pa reconducir esta situación "y atiendan les xustes demandes que-yos planteamos les persones, les direcciones de los centros, les organizaciones sindicales y la ciudadanía na cai".
