UVIÉU, 22 d'Agostu (EUROPA PRESS)
El sindicatu de profesores Suatea acusó esti vienres a la Conseyería d'Educación de "siguir optando por destruyir empléu estable" tres la convocatoria de cara al próximu cursu 2014-2015 d'un total de @2.526 places pa profesores interinos, de les que 818 "son medies xornaes", matiza la central.
Nuna nota prensa, la central realiza un un resume provisional de les places publicaes: "1066 de segundaria, de les que 461 son medies xornaes; 1253 de primaria, de les que 357 son medies xornaes; 207 de FP". "Esto supón un 32% de medies, y hai un total de 536 places itinerantes", puntualiza'l comunicáu.
La organización apunta que se constata que polo menos una cuarta parte de la plantiya docente "cambia tolos cursos". "Non toles places publicaes son vacantes. Dalgunes d'elles son sustituciones qu'apaecen xunto coles vacantes, anque'l profesoráu que les solicite va desconocer de qué tipu de sustitución se trata por alcontrase los centros educativos zarraos nel mes d'agostu", añade la nota.
"La Conseyería sigue apostando por destruyir empléu estable nes plantiyes docentes y conceder a los centros - tres numberoses movilizaciones el cursu pasáu- namás dalgunos de los pidimientos realizaos", quéxase Suatea. "La non cobertoria de les xubilaciones - calculamos en sobre unes 500 nel cursu 2013-14- xunto cola amortización de les places fixes- faen qu'una gran parte del profesoráu de los centros cambie tolos cursos, col consiguiente perxuiciu pal alumnáu y pa la continuidá del llabor educativo. Esti enclín aumenta sobremanera nes zones rurales pero nun ye esclusiva d'éstes", llamenta la organización.
Per otra parte, "la existencia de 818 medies xornaes (461 en secundaria y 357 en primaria) d'un total de 2526 vacantes y sustituciones sigue mostrando que'l profesoráu interín asturianu ta condenáu a la precariedá: un 32% del total de les places son a media xornada", afirma la nota. Según el sindicatu, "tamién hai un porcentaxe eleváu de profesoráu interín itinerante, concretamente 536 places son compartíes ente dellos centros educativos".
