BILBAO/UVIÉU, 22 Mar. (EUROPA PRESS) -
Un submarinista aficionáu alcontró esti xueves el cuerpu ensin vida d'una muyer flotando ente les localidaes bizcaines de Lekeitio y Ondarroa, cerca de la mariña, según informaron a Europa Press fontes de la Policía vasca.
L'afayu rexistróse a les dos y media de la tarde. Depués de columbrar el cadabre, el submarinista sollertó a la Ertzaintza. Poco depués, el cuerpu, n'avanzáu estáu de descomposición, foi rescatáu por efectivos de Salvamentu Marítimu, que lo llevaron hasta la mariña.
Depués treslladáronla'l Institutu Anatómicu Forense de Bilbao, pa practica-y l'autopsia. Pel momentu, desconozse la identidá de la finada.
Fontes de la Guardia Civil de Xixón consultaes por Europa Press confirmaron que tán en contactu cola Policía Autonómica Vasca por si pudiera ser una de los dos desaparecíes n'Asturies, Lorena Torre y Concepción Barbeira, que desaparecieron los díes 1 y 2 de marzu en Xixón y en Castrillón, respectivamente.
