MADRID, 17 d'Avientu (EUROPA PRESS)
El taxista de Parla, deteníu ayeri martes como presuntu asesín del ultra de los Riazor Blues, Javier Romero Taboada, de nomatu 'Jimmy', llámase Ismael López Pérez, tien 33 años y nun cuenta con antecedentes penales, según informaron a Europa Press fontes de la investigación.
Ismael López Pérez, casáu y con fíos, ye ún de los dos arrestaos a los que s'acusa d'un delitu d'homicidiu al consideralos autores materiales de la muerte del radical deportivista que tuvo llugar el pasáu 30 de payares na zona de Madrid Río, cerca d'onde hores dempués diba disputase l'alcuentru ente l'Atlético de Madrid y el Deportivo d'A Coruña.
Lleva polo menos dos años rexistráu como taxista en Parla, según dellos directorios web d'empreses y autónomos, qu'ubiquen la so casa social nel norte del conceyu.
Fontes policiales espliquen que Parla ye un conceyu nel qu'hai presencia d'elementos d'estrema derecha (la ideoloxía que profesen los máximos dirixentes del Frente Atléticu), concretamente na zona nueva, al este de la población. Sicasí, estos grupos nun cuenten nesti momentu con muncha actividá o organización, siempre según les mesmes fontes. Parla cuenta con un 30 por cientu de población inmigrante.
Nel marcu de la 'Operación Neptuno', les fuerces de seguridá yá practicaren un total de 41 detenciones, les últimes en Xixón, onde s'arrestó a dellos miembros de los Ultra Boys, la peña ultra del Sporting de Xixón, que cuenta con bona sintonía col Frente Atlético.
Testigos presenciales informaron a Europa Press el mesmu día de la engarradiella que vieren a miembros d'estos grupos participar na engarrada. Tamién esti miércoles resultó arrestada otra persona en Parla.
