La federación del sector argumenta que les patronales "sólo busquen" un incrementu económicu nos contratos
UVIÉU, 26 de Mayu (EUROPA PRESS)
La Federación Asturiana Sindical del Taxi acusó güei a les principales patronales del tresporte escolar por autocar, como CAR, Astra, Asvipmet y Asetra, d'organizar una campaña de "desprestixu" escontra'l sector del taxi dedicáu al tresporte d'escolares.
Asina, mediante nota prensa, los taxistes esplicaron que'l pasáu día 21 de mayu los escolares de distintos grupos de la rexón fueron "sorprendíos", polos conductores de los autocares, cola entrega d'una octaviella na que se "encamentaba" a los pas a exixir del Gobiernu del Principáu más dineru pal tresporte escolar n'autocar.
Según la Federación Asturiana del Taxi, les patronales se permiten "con total impunidá desprestixar" al serviciu de taxi argumentando una supuesta mayor calidá nel serviciu prestáu a los escolares polos autocares, a costa del serviciu de taxi.
Los taxistes, ante esti "nuevu ataque" al sector asturianu per parte de dalgunes patronales del tresporte colectivu, manifestaron la so "sorpresa y refugu" ante la "vergoñosa y hipócrita actitú".
Pa la Federación Asturiana Sindical del Taxi, detrás de l'actitú de les patronales s'escuende la intención de presionar utilizando a la población escolar, al Gobiernu rexonal p'algamar "una vez más", un incrementu económicu nos contratos de tresporte que-yos permitan algamar mayores beneficios.
Nesti sen, los taxistes señaron que "ya ye hora" de que l'Alministración Autonómica se "caltenga firme" ante la "constante Amenaza" de dexar ensin tresporte escolar al Principáu si nun se cede "nes sos pretensiones".
