BRUXELES/UVIÉU, 15 Abr. (EUROPA PRESS) -
Los directivos del fabricante de componentes p'automóviles Tenneco comprometiéronse ante'l vicepresidente de la Comisión y responsable d'Industria, Antonio Tajani, a caltener abierta la fábrica de Xixón, anque amenorgando'l so tamañu y númberu de trabayadores por aciu prexubilaciones y tresllaos, coles mires de vendela nun plazu máximu de dos años.
Esta propuesta foi treslladada a Tajani mientres una xunta en Roma pol presidente mundial de Tenneco, Gregg Sherrill, el conseyeru delegáu H.N. Nair y el conseyeru xurídicu J.D. Harrington, según informó la Comisión nun comunicáu.
"Mientres la xunta tratóse una solución que consistiría nun sustancial amenorgamientu de l'actual fábrica ensin cerrala. Esto esixiría atopar personal suxeto a xubilación antemanada y voluntarios pa dexar la fábrica o pa incorporase a otres plantes de Tenneco", según esplicó l'Executivu comuñal.
El restu de l'actual plantiya aseguraría la continuidá de la fábrica de Xixón, que trabayaría con un nuevu plan de negociu afechu al tamañu más pequenu. "Tenneco siguiría dirixiendo la fábrica mientres un periodu transitoriu d'aprosimao dos años hasta que tuviera llugar una tresferencia completa de la propiedá de la fábrica", esplica'l comunicáu.
"Nun momentu nel que la industria ta volviendo al centru de l'actividá económica n'Europa, tenemos qu'evitar por tolos medios que se cierren fábriques y que se pierdan puestos de trabayu. Por tanto, estimo daveres esta propuesta de Tenneco que dexa evitar el zarru de la so fábrica en Xixón coles mesmes que garantiza una continuidá de l'actividá industrial", dixo Tajani.
"Entiendo qu'esta propuesta tien que ser inda aldericada en detalle colos representantes de el trabayadores y les autoridaes nacionales pero pa mi constitúi claramente un pasu bien significativu na bona dirección. El mio equipu va contactar a les partes nos próximos díes pa intentar cerrar esti casu sobre la base d'estos principios", concluyó'l responsable d'Industria.
