UVIÉU, 25 de Febreru (EUROPA PRESS)
La población de Navelgas acueye esti vienres un homenaxe al investigador Manuel Menéndez (1909-1962), autor de la obra 'El cuarto de los valles'. El so tercer volume van presentalu mientres esta xornada los investigadores y profesores del Seminariu de Filoloxía Asturiana Ramón d'Andrés y Taresa Fernández Lorences.
Mientres l'actu descubriráse una placa n'honor al investigador. Tamién va presentase'l mapa de la toponimia tradicional del conceyu de Tinéu, al cargu de Fernando Álvarez-Balbuena y Andrés Menéndez. Va Concluyir con un recital poéticu, nel que van tomar parte los autores cuartanos Miguel Rojo, Xuan Bello y Antón García, y cola inauguración de la esposición fotográfica 'L'Asturies occidental antias yá güei'. Van tar presentes el director del Real Institutu d'Estudios Asturianos (Ridea), Ramón Rodríguez Álvarez, y un representante municipal.
En declaraciones a Europa Press d'Andrés reivindicó la calidá y el nivel de la investigación llingüística asturiana, de la que Menéndez foi pioneru, xunto con otres figures como Ramón Menéndez Pidal, Lorenzo Rodríguez-Castellano o Dámaso Alonso.
D'Andrés calificó de "modélicu" el tercer volume de 'El cuartu de los valles', qu'analiza la 'fala' d'esti área que toma parte de los conceyos de Tinéu y Valdés. Presentóse n'ochobre n'Uviéu y agora volverá presentase na casa de la cultura de Navelgas, de magar les 17.00 hores d'esti vienres.
La edición llega frutu de la collaboración ente'l Seminariu de Filoloxía Asturiana de la Universidá d'Uviéu y el Real Institutu d'Estudios Asturianos (Ridea), a partir de la documentación arrexuntada pol investigador, fináu en 1962. El trabayu completa los dos primeros, publicaos a títulu póstumu, en 1963 y 1965.
Esti tercer volume inclúi una parte de refranes y conxuros, un suplementu al vocabulariu y una relación alfabética de más de 5.000 topónimos d'El Cuartu de Los Val.les.
Nes próximes selmanes va haber otra presentación lliteraria rellacionada con Menéndez. Nesti casu, l'escritor Xulio Viejo va dar a conocer 'Palabras y Cosas de Bermiegu', otra investigación del llingüista cuartanu, nesti casu sobre'l conocíu pueblu quirosanu. Va ser en Grau, anque tovía nun hai fecha prevista.
