UVIÉU, 29 de Xunetu (EUROPA PRESS)
Los efectivos de rescate treslladaron a trés persones a dellos centros hospitalarios, firíes de diversa consideración (una mui grave), tres rescatales del agua, na playa de Salinas, en Castrillón.
Según los datos facilitaos pol Serviciu d'Atención Médica Urxente (SAMU) l'afectada de mayor consideración ye una muyer, d'unos 30 años d'edá. Evacuóla l'equipu médicu de la UVI-móvil d'Avilés, al Hospital San Agustín. Por cuenta de más pruebes y hasta nueva valoración médica, el so pronósticu ye mui grave. Los equipos sanitarios practicáron-y maniobres de reanimación cardiopulmonar avanzada mientres aprosimao 50 minutos.
A esti mesmu hospital treslladaron, nuna ambulancia de soporte vital básicu, un varón, de 25 años d'edá, con hipotermia leve. A la otra evacuada, una muyer de 21 años, rescatóla l'helicópteru de Salvamentu Marítimo, Helimer, y evacuáronla a la so base n'El Musel. Dende ellí treslladáronla al Hospital de Xove, na UVI-móvil de Xixón, activada pol SAMU.
El Centru de Coordinación d'Emerxencies recibió l'avisu a les 21.04 hores. L'avisu diolu'l coordinador del Serviciu de Salvamentu de Castrillón que, anque taba fuera d'horariu, alcuéntrase na zona. Indicó qu'había persones na lluvia.
Nesi momentu movilizóse l'helicópteru medicalizáu del Serviciu d'Emerxencies del Principáu d'Asturies (SEPA), col Grupu de Rescate y comunicóse l'incidente a Salvamentu Marítimo que de casualidá tenía'l so helicópteru realizando unos exercicios na zona de Cabu Peñes.
El coordinador de salvamentu de Castrillón que taba con un socorrista que tamién acabara'l serviciu metióse al agua. El socorrista con una tabla rescató a una muyer y el coordinador, con una moto acuática, a dos persones. A la cuarta rescatóla l'Helimer.
El Grupu de Rescate dexó al médicu na arena, qu'entubó a la muyer, que taba en parada hasta la llegada del equipu médicu de la UVI-móvil. Mentanto col helicópteru realizaron un rastrexu aereu pa comprobar que nun había más persones nel agua.
El médicu-rescatador atendió a los otros dos afectaos más graves y a otru varón que resultó ilesu.
El SAMU envió al llugar, amás de la UVI-móvil d'Avilés, una ambulancia de soporte vital básicu. Darréu activó a la UVI-móvil de Xixón pa recoyer a la rescatada evacuada pol Helimer na so base d'El Musel.
L'incidente, como marca'l protocolu, comunicóse a la Policía Llocal y a la Guardia Civil.
