KUALA LUMPUR, 14 Ago. (Thomson Reuters Foundation/EP) -
Dos muyeres fueron condergaes por un tribunal malayu a recibir latigazos y a pagar una multa dempués de que dambes confesaren que queríen caltener relaciones sexuales ente elles, informó esti martes un voceru de la Fiscalía del país asiáticu.
Les dos muyeres, de 22 y 32 años, fueron condergaes siguiendo los prefeutos de la 'sharia' o llei islámica y, según la sentencia, van recibir seis latigazos. Tamién tendrán de pagar caúna una multa de 3.300 ringgits (unos 700 euros), esplicó'l fiscal Muhamad Jasmizan Abdulá.
Ente les pruebes presentaes poles autoridaes figuren l'estáu nel que fueron atopaes les dos muyeres, desnudes, y un vibrador alcontráu nel interior d'un vehículu.
"Les relaciones sexuales ente persones del mesmu sexu tán prohibíes pol islam. Son un delitu y un erru moral", alegó en declaraciones a la Thomson Reuters Foundation, nes qu'almitió sicasí que se trata d'un fallu ensin precedentes nel estáu de Terengganu.
Les condergaes quedaron en llibertá provisional a la espera de que s'execute la sentencia, prevista pal 28 d'agostu. Asina, y siguiendo los preceptos de la 'sharia' "van ser cutíes con una vara de blima nel llombu mientres tán vistíes y sentaes".
Malaisia, con 32 millones d'habitantes, cuenta con un doble sistema llegal nel que les lleis civiles conviven coles doctrines marcaes pola comunidá islámica ya inclusive poles families. La sodomía ye un delitu castigáu con hasta 20 años de cárcel, anque la so aplicación nun ye frecuente.
Una vocera del grupu de Derechos Humanos Justice for Sisters, Thilaga Sulathireh, sorrayó que "el sexu consentíu ente adultos nun ye un delitu", polo que tarrez que la sentencia siente precedente y "aumente la discriminación escontra la comunidá LGTB".
