UVIÉU, 26 de Marzu (EUROPA PRESS)
El Tribunal Superior de Xusticia d'Asturies tornó dafechu los trés recursos d'apelación interpuestos pola representación llegal del exalcalde de Cuideiru y exdiputáu rexonal del PSOE, Francisco González Méndez, contra la sentencia dictada pola maxistrada de la Estaya Tercera de l'Audiencia Provincial d'Uviéu como Presidenta del Tribunal del Xuráu. Dicha sentencia, de 23 de xunu del 2014, confirmóse en tolos sos pronunciamientos con imposición de costes a los recurrentes.
Tamién torna los recursos de la antigua conceyala del mesmu Ayuntamientu, María Verena Prendes García, y del mesmu Conceyu de Cuideiru.
Tres el fallu de culpabilidá del Tribunal del Xuráu, la sala impunxo al exdiputáu socialista una multa de 14.400 euros y cuatro años de suspensión pa empléu o cargu públicu. A Maria Verena Prendes, pela so parte, impúnxose-y una pena de 3.600 euros de multa y trés años de suspensión.
Amás, dambos tienen qu'asumir la devolución de los pagos que los hosteleros que rexentaron chigres nel muelle de Cuideiru nos branos del 2003 al 2008 realizaron al Conceyu pa financiar el serviciu de vixilancia nocherniega qu'emprestaben los axentes de la Policía Llocal.
L'ingresu, que nun tenía regulación normativa, realizábase en metálico na Tesorería municipal, dende onde s'apurría en mano al xefe de la Policía, que lo repartía ente los axentes sin que constara en nómina.
