BARCELONA, 22 d'Avientu (EUROPA PRESS)
El Tribunal Superior de Xusticia de Catalunya (TSXC) decidió esti llunes por mayoría almitir a trámite toles querelles y denuncies contra'l presidente de la Generalitat, Artur Mas; la vicepresidenta del Govern, Joana Ortega, y la consellera d'Enseñanza, Irene Rigau, rellacionaos cola supuesta desobediencia al entamar el procesu participativu del 9 de payares sobre la independencia, "asina como toos aquellos fechos que, de manera directa o indirecta, tean relacionaos".
Según informó'l TSJC, la Sala Civil y Penal namás almitió les qu'apunten a algún d'estos trés cargos y relativos a la supuesta desobediencia de la resolución del Tribunal Constitucional (TC) del 4 de payares que suspendió la consulta alternativa, anque nun concreta qué delitos atribúi.
El tribunal nun almitió, sicasí, les querelles y denuncies que se presentaren contra'l conseyeru d'Interior, Ramon Espadaler; el voceru del Govern, Francesc Homs, nin contra'l líder d'ERC, Oriol Junqueras.
Tampoco aceptó a trámite les qu'apuntaben a la presidenta del Parlament, Núria De Gispert, nin contra los miembros de la mesa de la Cámara catalana Anna Simó, Lluís Corominas, Josep Rull y David Companyon.
Amás d'almitir a trámite les acusaciones contra Mas, Ortega y Rigau, el tribunal decidió que toos estos procedimientos acumúlense na querella más antigua, que ye la presentada pol sindicatu Manos Limpias.
XUNTA DE 4 HORES
Asina lo decidió esti llunes pela mañana nuna xunta d'unos cuatro hores la Sala Civil y Penal del TSXC, formada polos cinco maxistraos titulares de la mesma --Maria Eugènia Alegret, Carlos Ramos, Enric Anglada, Manel Abril y Francisco Valls-- y el presidente del TSJC, Miguel Ángel Gimeno.
Ente les querelles presentaes, ta la de la Fiscalía contra Mas, Rigau y Ortega por negase abiertamente a "dar el debíu cumplimientu a una resolución del máximu intérprete de la Constitución", al entamar el 9P.
Nella, el Ministeriu Públicu pidió imputa-yos, amás de desobediencia, los presuntos delitos de prevaricación, usurpación d'atribuciones xudiciales y malversación de caudales públicos.
