UVIÉU, 21 d'Agostu (EUROPA PRESS)
Los sindicatos UXT y CCOO volvieron concentrase esti llunes pola muerte d'un trabayador y esixir que se cumpla la Llei de Prevención de Riesgos Llaborales. Los responsables d'UXT y CCOO treslladaron el so apoyu y solidaridá a los compañeros y la familia del mozu senegalés fináu esti xueves afogáu nuna balsa ubicada dientro de la finca na que trabayaba, en Grandas de Salime.
El responsable d'Acción Sindical de CCOO, Gerardo Argüelles esixó una investigación axustada del socesu pa que, en casu de que se determinen, los responsables pasen a disposición xudicial. "Nuna sociedá avanzada nun pue concebise que los trabayadores pierdan la so vida nel exerciciu del so oficiu", dixo.
Asemeyaes fueron les palabres de la responsable d'UXT, Emma Fernández, qu'esixó'l cumplimientu de la llei de Prevención y destacó que si esi cumplimientu fuera una realidá evitaríense, "non el 100% de les muertes pero si un bon númberu d'elles".
Les organizaciones sindicales recordaron que s'abrió un númberu de cuenta p'ayudar a los familiares del nuevu a poder repatriar el cadabre.
Na concentración en memoria del nuevu fináu y en repulsa pola siniestralidá llaboral tamién tuvo la vicealcaldesa d'Uviéu, Ana Taboada, que conocía personalmente al fináu al que consideró "un amigu". Taboada recordó la tráxica historia del Senegalés que llegó va diez años a Asturies.
"Nel so momentu saquélu del CIE d'Aluche va yá diez años y consiguimos traelu a Asturies. Sufrió y brengó muncho por llograr los papeles, trabayando para ganase la vida de vendedor ambulante, de temporeru....", manifestó Taboada, que destacó que "nunca pudo volver a Senegal y ye yá'l tercer fíu que pierde la so madre".
Pa Taboada esti ye ún de los munchos exemplos pa esos que dicen que "los emigrantes vienen quitar los nuesos puestos de trabayu y que por contra detrás tienen una vida d'esfuerzu y sufrimientu".
