UVIÉU, 28 Ago. (EUROPA PRESS) -
Los vecinos de Les Arriondes, nel conceyu asturianu de Parres, lleven tres díes ensin suministru normalizáu d'agua nes sos cases y negocios, según confirmaron a Europa Press fontes vecinales. La situación nun tien visos de solución y nin el Conceyu nin la empresa que ta faciendo unes obres pa una nueva trayida de l'agua, tán ufiertando esplicaciones clares.
La situación ta obligando a los axentes de la Policía Llocal a trabayar p'atender les urxencies que se tán produciendo. Esti vienres, según esplicaron les fontes consultaes, informaron a los vecinos que diben tener abiertes les instalaciones deportives municipales, onde podríen tener agua pa duchase.
Los vecinos, énte la situación creada, convocaron una cacerolada pa esti vienres a les 16.00 hores en señal de protesta, reivindicando a les autoridaes competentes que pongan fin a tan llamentable situación.
La falta del suministru d'agua ta favoreciendo situaciones bien variopintes, como'l gran númberu que decide dir al ríu a rellenar botelles o calderos pa llevales pa casa. Nel casu de los negocios, el problema ye entá mayor. La mayoría ta intentando salvar la situación con cubes o depósitos pequeños, pero los veceros malpenes tienen presión d'agua nos sos cuartos de bañu.
Empresarios de la zona calificaron lo asocedío como un "caos total" y nun entienden que naide dea esplicaciones. Los que nun cunten con dalgún tipu d'alternativa o depósitu atópense coles quexes de los veceros y n'ocasiones nun puen dar serviciu dalg7n, col perxuiciu económicu qu'eso trai en plena dómina de branu. Lo peor, aseguren, ye que naide informa sobre cuándo se van a solucionar los problemes del suministru. Yá hai turistes que colaron de Les Arriondes por esta razón.
