UVIÉU, 24 de Xunetu (EUROPA PRESS)
El Plenu del Conseyu Xeneral del Poder Xudicial (CXPX) reelixó esti xueves al maxistráu Ignacio Vidau Argüelles pal cargu de presidente del Tribunal Superior de Xusticia d'Asturies (TSXA).
Con 12 votos a favor, Ignacio Vidau púnxose en cabeza nel Plenu ante los seis votos que llogró'l maxistráu Carlos Javier Álvarez y los dos del maxistráu José Ignacio Pérez Villamil, según indicó'l CGPJ en nota prensa esti xueves.
El maxistráu encara asina una tercer etapa al frente del citáu Tribunal, tres nomalu nomáu pal cargu n'avientu del 2003 y reelixilu n'abril del 2009. El presidente del TSX asturianu nació en setiembre de 1952 ya ingresó na carrera xudicial n'avientu de 1978.
Los sos primeros destinos xudiciales fueron los xulgaos de distritu de Badalona (Barcelona), y Llanes, Samartín del Rei Aurelio, Llangréu y Avilés, toos ellos n'Asturies.
Ascendió a maxistráu n'avientu de 1989 pasando a ocupar plaza nel xulgáu de lo social númberu 1 d'Avilés y darréu, en xineru de 1995 nel xulgáu de lo social númberu 3 d'Uviéu. En xineru del 2001 tomó posesión del cargu de maxistráu de la Sala de Civil y Penal del Tribunal Superior de Xusticia d'Asturies, destín nel que permaneció hasta'l so primer nomamientu como presidente del Tribunal Superior de Xusticia d'Asturies, asocedíu n'avientu del 2003.
Dende 1994 forma parte de la Sala de Gobiernu del Tribunal Supremu, primero como miembru electu y dende l'añu 2003 como miembru natu na so condición de presidente del Tribunal. Foi ponente nel Alcuentru de Xueces y Maxistraos d'Asturies, Cantabria y Castiella y Lleón que, dientro del Plan de Formación descentralizada del Conseyu Xeneral del Poder Xudicial, celebróse en Salamanca en xunu del 2012.
