UVIÉU, 19 Mar. (EUROPA PRESS) -
La Xunta pola Defensa de la Llingua Asturiana (XDLA) afirmó que la Llei d'Usu y Promoción del Asturianu ye una llei "incumplida y escosada" porque en dos décades dende qu'entró en valir "demostróse a les clares qu'ensin oficialidá nun hai llei que-y valga al asturianu".
Al traviés d'una nota de prensa, la XDLA posicionóse asina coincidiendo colos 20 años de l'aprobación d'esta norma y del actu qu'entama esti llunes la Conseyería d'Educación y Cultura pa celebrar el so aniversariu. Trátase d'una mesa de debate nel Teatru Campoamor onde van participar dellos xuristes.
Sicasí, dende la organización de defensa del asturianu afirmen que nun ye tiempu de "celebrar y falar de les bondaes d'esta norma de tenese desarrolláu, cosa que los socesivos gobiernos socialistes nun quixeron facer". "Nun hai nada que celebrar, son 20 años d'incumplimientos, 20 años perdidos", señalen.
Asina, indiquen que la Llei d'Usu namás tuvo avances nel usu de la toponimía, "pero namás d'una manera simbólica y por iniciativa de dalgunos conceyos, porque la mesma Alministración que los aprueba depués nun los utiliza, invisibilizándolos".
Per otru llau, indiquen que la RTPA ye'l "meyor exemplu d'incumplientu d'esta llei" al emitir n'asturianu un 3% en TPA y 50 minutos a la selmana en RPA "ensin que'l Gobiernu o la Xunta Xeneral muevan un deu".
Amás, mencionen los recortes nel presupuestu de la política llingüística y que la ufierta educativa n'asturianu "sigue ensin tar xeneralizada" y que cada añu hai escolinos "a los que-yos ponen problemes pa exercer el so derechu a asistir a clase d'asturianu".
Otra manera, indiquen qu'hai cuidadanos a los que se-yos ponen problemes dende les instituciones pa utilizar l'asturianu y que nos últimos meses el PP ta impidiéndose a dellos Conceyos desarrollar una política llingüística a nivel municipal, "dalgo pa lo que según lo establecío pola Llei d'Usu tienen potestá".
Per otru llau, la XDLA afirma que'l presidente asturianu, Javier Fernández, y la líder del PP, Mercedes Fernández, "son los mayores enemigos del asturianu y los que más dicen defendela". "Javier Fernández dirixe un Gobiernu que nun cumple y desarrolla esta norma y Mercedes Fernández dirixe un partíu que ta atacando les posibilidades de desarrollu d'esta Llei, yá sía a nivel autonómicu o nos Conceyos".
"Depués de 20 años d'incumplimientos, queda demostrao qu'ensin oficialidá nun hai Llei d'Usu que valga, que la oficialidá ye l'únicu marcu llegal qu'establez la Constitución española y que permite garantizar que los asturianos escueyan llibremente en que llingua vivir", sentencien.
