La XDLA pide a los diputaos favorables a la oficialidá qu'abran yá la reforma del Estatutu

La actriz Maria Cotiello lee el manifiesto de la Xunta Pola defensa del asturian
EUROPA PRESS
Publicado 24/04/2018 15:43:24CET

UVIÉU, 24 Abr. (EUROPA PRESS) -

La Xunta pola Defensa de la Llingua Asturiana (XDLA) felicitóse pol "éxitu" de la manifestación "multitudinaria" d'esti sábadu y recuerden que reclamó la oficialidá "nesta llexislatura". Por eso, piden a los diputaos favorables a la oficialidá que presenten nel rexistru de la Xunta Xeneral una propuesta de reforma del Estatutu.

Al traviés d'una nota de prensa, la organización que convocó la manifestación d'esti sábadu 21 afirmó que nella demostróse'l "clamor social" a favor de la oficialidá. Sicasí, espliquen qu'agora-yos toca a los políticos "facer el so llabor y atender pa les demandes de la xente".

Una demanda, la d'oficialidá, que pa la XDLA tien que tratase nesta llexislatura, porque "nun ye aceptable éticamente ser conscientes d'una inxusticia y, pudiendo facelo yá, esperar a tiempos electorales meyores pa poner fin a esa inxusticia".

"La manifestación nun foi pa que se tomara nota del apoyu social a la oficialidá, foi un encargu a les fuercies polítiques partidaries de dar derechos a los falantes d'asturianu y gallego-asturianu pa que lo faigan yá", indiquen.

Asina, espliquen que faen falta 12 diputaos pa que presenten na Xunta Xeneral la propuesta de reforma del artículu 4 del Estatutu y que dende va meses tienen la redacción que-yos propunxeron, ellaborada "coles aportaciones y conseyos d'un grupu de xuristes".

"Faigan depués el debate con lluz y taquígrafos, a la vista de la ciudadanía, y voten", afirma la organización, qu'esplica que depués de la oficialidá "habrá tiempu" p'aprobar una Llei de Normalización Llingüística que desenvuelva, "col mayor consensu posible y cola aportación de toles fuercies polítiques, sindicales y sociales", cómo va ser esa oficialidá.

"Va ser un trabayu d'años, polo que ye importante ponese a trabayar yá", diz la XDLA, que recuerda que cola cuestión llingüística Asturies lleva "cuatro décades de retrasu" y qu'agora preséntase "la posibilidá real de qu'haya una mayoría na Xunta Xeneral pa llogralo".

Per otru llau, informen de qu'esti vienres 4 de mayu, la Xunta pola Defensa de la Llingua Asturiana, convoca la 34ª manifestación del Día de les Lletres Asturianes y que "ye un bon momentu alredor d'eses feches pa qu'esos 12 diputaos presentaren nel rexistru de la Xunta Xeneral la propuesta de reforma del artículu 4".