UVIÉU, 23 Ene. (EUROPA PRESS) -
El colectivu de llesbianes, gais, transexuales y bixexuales d'Asturies, XEGA, llanzó una campaña que busca una meyor atención policial al so colectivu.
Dende la organización editaron un llibru y dellos materiales con datos y encamientos a hora la d'actuar los axentes. XEGA recuerda que'l 'Informe sobre incidentes rellacionaos colos delitos d'odiu' (Ministeriu del Interior, 2017), recueye que cerca del 20% de los delitos d'odiu rexistraos taben motivaos pola orientación sexual o la identidá o espresión de xéneru de les víctimes, aumentando un 36% en comparanza añu anterior y reflexando qu'ente'l 70 y el 80 por cientu de les agresiones siguen ensin ser denunciaes.
"A lo llargo d'estos 25 años, vimos cómo incontables denuncies por acosu y agresiones hacia LGTB+ yeren tornaes, archivaes o, nel meyor de los casos, tramitaes como meres faltes", llamentaron.
Consideren qu'esta situación llevó en munches ocasiones a la desgana y a la rocea de les víctimes hacia los cuerpos de seguridá y al sistema xudicial. "Ye por eso que la Policía Local tien que cumplir un rol esencial na protección de los derechos de tola ciudadanía uvieina", indicaron, xustificando la campaña.
Ente los encamientos a los axentes ta que nes comparecencies policiales faigan constar "de forma clara y espresa nel informe policial" toles informaciones llograes y les dilixencies practicaes.
"Pa conocer la dimensión de les infracciones penales y alministratives d'odiu o discriminatories nel conceyu, la xefatura de Policía Local tendría que realizar un rexistru estadísticu mensual y anual de les actuaciones desenvueltes pol serviciu nesti ámbitu", añaden.
