XIXÓN, 14 Ago. (EUROPA PRESS) -
El voceru de Xixón Sí Puede (XsP), Mario del Fueyo, amosó esti martes "l'arguyu" del so grupu municipal por participar nes manifestaciones antitaurines. Del Fueyo recordó que dende los entamos de la formación presentaron distintes iniciatives "p'acabar col maltratu animal en cualquier ámbitu municipal, que nun espolletaron polos votos en contra de Foru, PP y Ciudadanos a lo que se xunía l'astención del PSOE".
Del Fueyo llamentó que dende'l Grupu Municipal del PP del Conceyu de Xixón tean más esmolecíos "por llindar el derechu de manifestación" que por condergar los ataques franquistes y fascistes" que sufrieron les sedes de Podemos, PSOE ya IX na ciudá. "Manuel del Castillo ausentóse nel penúltimu Plenu municipal precisamente pa nun votar la condena a les agresiones franquistes que sufrimos en Xixón", criticó'l voceru de XsP.
"El PP sigue nel so viraxe pa competir pol votu d'estrema derecha, y una de les estratexes más clásiques pa ello ye la de confrontar a la ciudadanía ente sí, como quier faer agora Manuel del Castillo cola tema taurina", llamentó en nota de prensa.
Dende XsP destacaron que'l PP sigui "fondiáu nuna España que yá nun esiste". "Les últimes encuestes amuesen el refugu mayoritariu de la sociedá a la brutalidá de les corríes de toros, especialmente ente los más nuevos, onde'l refugu supera'l 80 por cientu".
