MADRID, 15 d'Avientu (EUROPA PRESS)
El xuez de l'Audiencia Nacional Fernando Andreu refugó dictar l'ingresu en prisión incondicional y sin fianza del expresidente de Caja Madrid y Bankia Rodrigo Rato como solicitó'l pasáu vienres la formación Unión, Progreso y Democracia (UPyD).
Nun autu fechu públicu esti llunes, el xuez reprocha, amás, que'l partíu busque "el llogru de notoriedá" al formular esti pidimientu.
Andreu respuende al partíu que la busca de "la exemplaridá, l'escarmientu, la eficacia o la tranquilidá social" nun puen llograse "per mediu de l'adopción de midíes cautelares, nes que los fines nun puen ser los d'antemanar el cumplimientu d'una hipotética condena, nin menos tovía'l llogru de notoriedá per parte del qu'interesa del xuez que s'adopten estes midíes".
UPyD, personáu como acusación popular na causa na que'l xuez investiga la fusión y salida a Bolsa de Bankia, consideraba que la midida yera procedente pola existencia de riesgu de fuga, y de destrucción de pruebes, dao que Rato cuenta con "un importante patrimoniu nel estranxeru".
Sicasí, el xuez precisa que la gravedá que los delitos que s'imputen a Rato, societarios y relativos al mercáu y los consumidores, nun pue amparar, por sí sola, "l'adopción d'una midida tan escepcional como la de prisión preventiva".
Refuga qu'exista riesgu de fuga, de torga a l'acción de la xusticia o de reiteración delictiva y especifica que Rato tuvo a disposición del Xulgáu en toa ocasión en que lu llamaron, "cumpliendo toes y caúna de les obligaciones procesales que la llei impón a los procesaos". "Les alegaciones nun pasen de ser meres hipótesis (...) construyíes sobre bases o fundamentos sin acreditar abondo", añade.
L'escritu apunta que, nesta fase del procedimientu, tien que prevalecer el principiu de presunción d'inocencia y reprocha a l'acusación "lo improcedente de la so solicitú", dao que nun reclamó la celebración de la comparecencia prevista nel artículu 505 de la llei procesal, requisitu indispensable pa pidir que se modifiquen les midíes cautelares contra los imputaos.
